Tramp Ho‘rmuz bo‘g‘ozi ochilmasa ham Eron bilan urushni yakunlashga tayyor — WSJ
Ho‘rmuz bo‘g‘ozini qayta ochish harbiy amaliyotni uzaytirishni talab qilishi mumkin.
Tramp yordamchilariga agar Ho‘rmuz bo‘g‘ozi ochilmasa ham AQShning Eronga qarshi harbiy harakatlarni yakunlashga tayyorligini aytgan. Bu haqda The Wall Street Journal prezident ma’muriyati vakillariga tayanib, xabar bermoqda.
Manbalarning aytishicha, so‘nggi kunlarda Tramp va uning maslahatchilari Ho‘muz bo‘g‘ozini ochish operatsiyasi to‘rt-olti haftalik muddatdan oshib ketishi munkin, degan xulosaga kelgan. Xabar qilinishicha, prezident AQShning asosiy maqsadlari amalga oshirilishini, ya’ni Eron flotini zaiflashtirish va raketa dasturini yo‘q qilishni xohlamoqda.
Nashr Tramp amaldagi harbiy harakatlarni bosqichma-bosqich to‘xtatishni, bir vaqtning o‘zida esa Tehronga diplomatik bosim o‘tkazib, erkin savdoni tiklashga erishishni rejalashtirayotganini yozgan.
Manbalar bu reja amalga oshmasa, Vashington Yevropa va Fors ko‘rfazi davlatlari hamkorlaridan bo‘g‘ozni ochishda yetakchi rolni o‘z zimmalariga olishni talab qilishini bildirgan.
“Tramp va uning jamoasi Ho‘rmuz bo‘g‘ozi AQShga qaraganda Yevropa, Yaqin Sharq va Osiyo davlatlari uchun ancha muhimroq, deb hisoblaydi. So‘nggi bir necha hafta davomida Vashingtondagi ma’muriyat vakillari hamkor va ittifoqchilarga bo‘g‘ozni ochish bo‘yicha muzokaralarga yoki operatsiyalarga tayyor turishni so‘rab murojaat qilgan”, deyiladi xabarda.
