Yaqin Sharqdagi mojarolar arab davlatlariga 200 mlrd dollargacha zarar yetkazishi mumkin — BMT
Mojaro oqibatida mintaqada 3,6 millionga yaqin ish o‘rni yo‘qolishi va millionlab odamlar qashshoqlikka tushib qolishi mumkin.
BMTning hisob-kitoblariga ko‘ra, Yaqin Sharqda yuzaga kelgan keskinlik arab davlatlari iqtisodiyotiga jiddiy zarar yetkazishi mumkin. Tahlillarga ko‘ra, mintaqa iqtisodiyoti mojarolar sabab 120 milliard dollardan 194 milliard dollargacha yo‘qotishlarga duch kelishi ehtimoli mavjud.
Bloomberg xabariga ko‘ra, BMT Taraqqiyot Dasturi tadqiqotida AQSH va Isroilning Eronga qarshi ehtimoliy harbiy harakatlari mintaqa iqtisodiy o‘sishiga qariyb 200 milliard dollargacha zarba berishi mumkinligi qayd etilgan.
Hisobot mualliflari mojarolar qisqa muddat davom etsa ham, ularning ijtimoiy-iqtisodiy oqibatlari keng ko‘lamli bo‘lishi mumkinligini ta’kidlamoqda. Tahlillarga ko‘ra, Yaqin Sharqdagi keskinlik arab davlatlari iqtisodiyotida o‘sish sur’atlarini sezilarli darajada sekinlashtirishi mumkin.
Mutaxassislarning baholashicha, mojaro oqibatida mintaqada ishsizlik darajasi qariyb 4 foizga oshishi mumkin. Bu esa taxminan 3,6 million ish o‘rni qisqarishiga va 4 millionga yaqin aholining qashshoqlikka tushib qolishiga olib kelishi ehtimoli bor.
Tadqiqotda eng katta iqtisodiy yo‘qotishlar Fors ko'rfazi davlatlari hamda Levant (Bahrayn, Qatar, Quvayt, BAA, Oman,Livan) hududida kuzatilishi mumkinligi qayd etilgan. Ushbu hududlarda yalpi ichki mahsulot hajmi 5 foizdan ortiq qisqarishi mumkinligi taxmin qilinmoqda.
Bundan tashqari, mintaqadagi keskinlik global energiya bozorlariga ham ta’sir ko‘rsatmoqda. Hormuz bo‘g‘ozi orqali yuk tashishdagi xavf va cheklovlar energiya resurslari, oziq-ovqat hamda o‘g‘it narxlarining oshishiga olib kelishi mumkinligi qayd etilgan.
