Afg‘onistonda suv toshqinlari va ko‘chkilar oqibatida 40 dan ortiq kishi halok bo'ldi
Tabiiy ofatlar sabab 476 ta uy shikastlangan, 290 gektarga yaqin qishloq xo‘jaligi yerlari zarar ko‘rgan.
Afg‘oniston hududida davom etayotgan kuchli yog‘ingarchiliklar oqibatida yuzaga kelgan suv toshqinlari va ko‘chkilar natijasida kamida 42 kishi halok bo‘ldi, 66 kishi jarohat oldi. Bu haqda Ariana News telekanali mamlakatning tabiiy ofatlarni boshqarish idoralariga tayanib xabar berdi.
Ma’lumotlarga ko‘ra, mamlakatda 25-martdan buyon davom etayotgan kuchli yomg‘irlar oqibatida tabiiy ofatlar yuzaga kelib, aholi yashash hududlari va infratuzilmalarga jiddiy zarar yetkazgan.
Afg‘oniston Tabiiy ofatlarni boshqarish boshqarmasi ma’lumotiga ko‘ra, tabiiy ofatlar natijasida kamida 476 ta turar-joy binosi shikastlangan, shuningdek, qariyb 290 gektar qishloq xo‘jaligi yerlari yuvilib ketgan. Ofatlar oqibatida jami 1140 ta oila zarar ko‘rgan.
Rasmiylarning ta’kidlashicha, qurbonlarning aksariyati mamlakatning markaziy va sharqiy hududlarida, jumladan Parvon, Maydan Vardak, Daykundi viloyatlarida qayd etilgan. Ayrim hududlarga kirish imkoniyati cheklanganligi sababli qutqaruv ishlari murakkablashmoqda.
Mutasaddi idoralar yaqin kunlarda yog‘ingarchilik yana davom etishi mumkinligini bildirib, suv toshqinlari va ko‘chkilar xavfi saqlanib qolayotganidan ogohlantirdi.
Shu bilan birga, qo‘shni Pokistonning Xayber Pahtunxva viloyatida ham kuchli yog‘ingarchiliklar oqibatida 17 kishi halok bo‘lgan, 56 kishi jarohat olgani ma’lum qilindi.
