AQSh Grenlandiyadagi harbiy bazalarga kirish bo‘yicha Daniya bilan muzokara olib bormoqda

 

Pentagon Denmark bilan Grenlandiya hududida joylashgan uchta harbiy bazaga kirish huquqi bo‘yicha muzokaralar olib bormoqda. Bu haqda The New York Times nashri xabar berdi.

 

Ma’lum qilinishicha, ushbu masala AQSh Shimoliy qo‘mondonligi rahbari Gregory M. Guillot tomonidan AQSh Kongressida o‘tkazilgan eshituvlar chog‘ida tilga olingan. Uning so‘zlariga ko‘ra, AQSh harbiylari Grenlandiya hududidagi turli harbiy obyektlarga kirish imkoniyatlarini kengaytirishdan manfaatdor.

 

Xususan, muzokaralar Grenlandiyaning janubida joylashgan Narsarsuaq hamda orolning janubi-g‘arbiy qismidagi Kangerlussuaq hududlarini ham qamrab oladi. Ushbu obyektlardan AQSh harbiylari ilgari foydalangan bo‘lib, amerikaliklar 1950-yillarda Narsarsuaqdan, 1990-yillarda esa Kangerlussuaqdan chiqib ketgan.

 

Nashrning yozishicha, ushbu bazalardagi harbiy infratuzilmaning katta qismi demontaj qilingan bo‘lsa-da, mazkur hududlarda kichik aeroportlar faoliyatini davom ettirmoqda. Hozircha Grenlandiyada joylashtirilishi mumkin bo‘lgan AQSh harbiy xizmatchilari soni haqida rasmiy ma’lumot berilmagan.

 

Muzokaralar 1951-yildagi AQSH va Daniya o'rtasidagi kelishuvlarga asoslanmoqda. Ayni paytda Grenlandiya hududida bitta AQSh harbiy bazasi faoliyat yuritmoqda.

 

Avvalroq Donald Tramp Grenlandiya AQSh milliy xavfsizligi nuqtayi nazaridan muhim hudud ekanini ta’kidlab, orol Qo‘shma Shtatlar tarkibiga qo‘shilishi kerakligi haqida bir necha bor fikr bildirgan edi. U ushbu masalani Mark Rutte bilan ham muhokama qilgani ma’lum qilingan.