Eron urushining iqtisodiyotga ta’siri oylar davomida seziladi — Avstraliya bosh vaziri
Avstarliya hukumati global iqtisodiy bosimlardan aholini to‘liq himoya qila olmasligini bildirdi.
Avstraliya bosh vaziri Antoni Albanazi Eron bilan bog‘liq mojaro sabab yuzaga kelgan iqtisodiy beqarorlik bir necha oy davom etishini ma’lum qildi. Bu haqda BBC xabar berdi.
Bosh vazirning ta’kidlashicha, mojaro tarixdagi eng katta yonilg‘i narxi oshishiga sabab bo‘lgan va bu allaqachon aholi daromadlariga bosim o‘tkazmoqda.
“Avstraliya bu urushda ishtirok etmayapti, ammo uning oqibatida barcha yuqori narxlarni to‘lamoqda”, — dedi Albanezi.
Ma’lumotlarga ko‘ra, AQSh va Isroilning Eron bilan urushi hamda Ho‘rmuz bo‘g‘ozining amalda yopilishi fonida dunyo bo‘ylab yoqilg‘i narxlari keskin oshgan.
Albanezi oldinda oson bo‘lmagan davr turganini tan olib, hukumat global iqtisodiy bosimlardan aholini to‘liq himoya qila olmasligini qayd etdi.
Shu bilan birga, hukumat vaqtinchalik choralarni e’lon qildi: yoqilg‘i aksizi ikki barobarga kamaytiriladi, og‘ir transport vositalari uchun yo‘l to‘lovlari uch oyga bekor qilinadi.
Bundan tashqari, ichki ta’minotni mustahkamlash va yoqilg‘i importini oshirish bo‘yicha choralar ko‘rilmoqda.
Bosh vazir fuqarolarni yoqilg‘idan oqilona foydalanishga chaqirib, imkon qadar jamoat transportidan foydalanishni tavsiya etdi.
Shuningdek, vahimali xarid qilishdan tiyilish kerakligini bildirdi. Murojaat yakunida u mamlakatni birlikka chaqirib, Avstraliya global muammolarni “birgalikda va o‘ziga xos tarzda” yengib o‘tishini ta’kidladi.
