Haydovchilar uchun jarima ballari bo‘yicha imtiyozlar borligi aytildi
Haydovchi 12 oy davomida umuman jarima ballari olmasa, keyingi birinchi qoidabuzarlik uchun jarima ballari qo‘llanilmaydi.
Haydovchilarga nisbatan qo‘llaniladigan jarima ballari tizimida qator imtiyozlar borligi aytildi.
Amaldagi tartibga ko‘ra, agar haydovchi oxirgi jarima ballini olganidan so‘ng 6 oy davomida yangi qoidabuzarlik sodir etmasa, uning umumiy jarima ballaridan 2 ball chegirib tashlanadi. Agar mavjud ballar soni 2 tadan kam bo‘lsa, ular to‘liq bekor qilinadi va jarima ballari hisoblanishi yangidan boshlanadi.
Shuningdek, haydovchi 12 oy davomida umuman jarima ballari olmasa, keyingi birinchi qoidabuzarlik uchun jarima ballari qo‘llanilmaydi.
Agar qoidabuzarlik bo‘yicha noto‘g‘ri qaror qabul qilingan bo‘lsa, u vakolatli organlar yoki sud tomonidan bekor qilinadi va tegishli jarima ballari ham olib tashlanadi.
Avvalroq 1-apreldan yo‘l qoidabuzarliklari uchun jarima ballari mavjud avtomatlashtirilgan foto va video qayd etish tizimlari orqali aniqlangan holatlarda ham hisoblanishi ma’lum qilingandi.
Unga ko‘ra, yo‘l harakati qoidalarini buzish holatlari endilikda faqat Yo‘l harakati xavfsizligi (YHX) xodimlari tomonidan emas, balki yo‘lga o‘rnatilgan kamera tizimlari orqali qayd etilgan taqdirda ham jarima ballariga ta’sir qiladi.
