Isroil hujumlari oqibatida Bayrutda 7 kishi halok bo‘ldi
Shuningdek, “Hizbulloh” Livan janubida Isroil qo‘shinlariga qarshi jang qilmoqda.
Isroil harbiylari Bayrutning janubiy chekka hududlariga hujum uyushtirdi. Harbiylar mazkur zarbalar yuqori martabali “Hizbulloh” qo‘mondonini yo‘q qilishga qaratilganini bildirdi, deya xabar bermoqda Al Jazeera.
Livan Sog‘liqni saqlash vazirligi ma’lumotiga ko‘ra, hujumlar oqibatida kamida 7 kishi halok bo‘lgan. Jnah hududidagi zarbada 5 kishi halok bo‘lib, 21 kishi jarohatlangan, Xaldehda esa yana 2 kishi halok bo‘lgan.
Mahalliy OAV va manbalar zarba turar joyga emas, balki avtomobillarga qaratilgan bo‘lishi mumkinligini aytgan.
Shuningdek, “ Hizbulloh” Livan janubida Isroil qo‘shinlariga qarshi jang olib borayotganini, chegara hududlarida “shiddatli to‘qnashuvlar” bo‘layotganini ma’lum qildi. Isroil hududiga ham raketa hujumlari uyushtirilgan.
Isroil OAVlari “Hizbulloh” tomonidan 40 dan ortiq raketa uchirilganini, so‘nggi to‘qnashuvlarda kamida 10 nafar isroillik askar halok bo‘lgani e’lon qildi.
Bundan tashqari, BMTning UNIFIL missiyasiga mansub 3 nafar tinchlikparvar ham Livan janubida halok bo‘lgan. Umumiy hisobda mamlakatda 1 200 dan ortiq odam halok bo‘lgan, 1 milliondan ortiq kishi ko‘chishga majbur bo‘lgan.
Isroil bosh vaziri Binyamin Netanyahu janubiy Livandagi harbiy amaliyotni kengaytirishni buyurgan.
