Jizzaxda jamoat transportida 1-apreldan to‘lov uchun naqd pul qabul qilinmaydi

Jizzax shahrida jamoat transportida yo‘lkira haqini to‘lashda naqd puldan voz kechib, to‘liq elektron to‘lov tizimini joriy etish rejalashtirilmoqda. Bu haqda mahalliy hokimlik qarori qabul qilindi.

 

Qarorga ko‘ra, shaharda jamoat transporti xizmatlari sifatini oshirish, to‘lovlar shaffofligini ta’minlash va sohada raqamli texnologiyalarni keng joriy etish maqsad qilingan. Shuningdek, ushbu choralar orqali yashirin iqtisodiyotni qisqartirish va elektron to‘lov tizimlaridan foydalanishni rag‘batlantirish ko‘zda tutilgan.

 

Ma’lum qilinishicha, amaldagi tariflarga muvofiq, Jizzax shahrida avtobuslarda yo‘lkira haqi bir yo‘lovchi uchun 3000 so‘m etib belgilangan. Elektron to‘lov tizimi — ATTO orqali to‘lov amalga oshirilganda esa rag‘batlantiruvchi chegirma qo‘llanilib, yo‘lkira 2100 so‘mni tashkil etadi.

 

Qarorga asosan, 2026-yil 1-apreldan boshlab shahar avtobuslarida yo‘l haqini naqd pulda qabul qilish amaliyoti to‘liq bekor qilinadi. Yo‘lovchilardan to‘lovlar faqat elektron shaklda qabul qilinadi.

 

Shu maqsadda, Jizzax shahrida avtobus bekatlariga o‘z-o‘ziga xizmat ko‘rsatuvchi infokiosklar o‘rnatilishi rejalashtirilgan. Mazkur qurilmalar orqali yo‘lovchilar elektron chiptalarni xarid qilish imkoniyatiga ega bo‘ladi. Infokiosklar o‘rnatilishi lozim bo‘lgan joylar ro‘yxati tegishli idoralar tomonidan shakllantiriladi.

 

Bundan tashqari, shahardagi barcha avtobuslar maxsus validatorlar bilan jihozlanib, yo‘l haqini avtomatlashtirilgan ATTO tizimi orqali to‘lash doimiy nazoratga olinadi.