O‘zbekistonda internetsiz mobil aloqa tarif rejalari joriy etilishi mumkin
Mobil aloqa operatorlari tomonidan internet trafigisiz tarif rejalarini taklif etish majburiy bo‘lishi mumkin.
O‘zbekiston Respublikasi Adliya vazirligi tashabbusi bilan mobil aloqa xizmatlarida yangi o‘zgarishlar ko‘zda tutilmoqda. Vazirlik tomonidan aholining turli qatlamlari ehtiyojlarini hisobga olgan holda tarif rejalarini takomillashtirishga qaratilgan Hukumat qarori loyihasi ishlab chiqildi.
Hujjatga ko‘ra, mobil aloqa operatorlari tomonidan internet trafigisiz — faqat qo‘ng‘iroqlar va SMS-xabarlardan iborat tarif rejalarini taklif etish majburiy bo‘lishi mumkin.
Qayd etilishicha, ayni paytda bozorda bunday tarif rejalarining mavjud emasligi ayrim fuqarolar uchun qo‘shimcha xarajatlarni keltirib chiqarmoqda. Xususan, internetdan foydalanmaydigan keksa yoshdagilar majburiy tarzda internet paketi mavjud tariflarga ulanishga majbur bo‘lmoqda.
Shuningdek, ayrim ota-onalar voyaga yetmagan farzandlarini zararli axborotlardan himoya qilish maqsadida internetsiz tariflarni afzal ko‘rsa-da, hozircha bunday tanlov imkoniyati cheklangan.
Mazkur qaror loyihasi manfaatdor vazirlik va idoralar bilan kelishilgan.
Hujjat 31-mart kuni jamoatchilik muhokamasi uchun e’lon qilingan.
