O‘zbekistonda poyezdlar kechiksa, yo‘lovchilarga kompensatsiya to‘lanadi
Yo‘lovchilardan poyezdlar belgilangan jadvaldan kech kelishi, manzilga kech yetib borishi haqida shikoyatlar kelib tushgan.
Raqobat qo‘mitasi tomonidan yuborilgan so‘rov asosida mahalliy yo‘nalishlarda (oddiy va tez yurar) poyezdlar kechiksa, yo‘lovchilarga pullik kompensatsiya to‘lash tartibi belgilanmoqda.
Ma’lum qilinishicha, so‘nggi yillarda Qo‘mitaga va ijtimoiy tarmoqlarga yo‘lovchilar tomonidan poyezdlar belgilangan jadvaldan kech kelishi, manzilga kech yetib borishi haqida 2025-yilda ushbu masala bo‘yicha Raqobat qo‘mitasiga 51 ta murojaat shikoyatlar kelib tushgan.
Xususan, Toshkent–Buxoro–Toshkent yo‘nalishi bo‘yicha harakatlanuvchi “Sharq” poyezdlari doimiy ravishda 40 daqiqadan 1 soatgacha kechikib kelayotgani ta’kidlangan. Yo‘lovchilar chiptalarida ham poyezd kelishi haqidagi to‘g‘ri ma’lumot ko‘rsatilmagani qayd etilgan.
Qonunchilikda esa mahalliy yo‘nalishlarda poyezd kechiksa, yo‘lovchilarga kompensatsiya to‘lash tartibi belgilanmagani aniqlandi.
“Iste’molchilarning huquqlarini himoya qilish to‘g‘risida”gi qonunga ko‘ra, iste’molchilar tovar va xizmatlarni erkin tanlash, sifatli bo‘lishini talab qilish hamda moddiy va ma’naviy zararning qoplanishini talab qilish huquqiga ega.
Shu munosabat bilan Raqobat qo‘mitasi Transport vazirligiga so‘rov yuborib, yo‘lovchilar huquqlarini ta’minlash maqsadida yangi qoidalar joriy etilishini talab qilgan.
Vazirlik hozirda “O‘zbekiston Respublikasi temir yo‘l transportida yo‘lovchilar, bagaj va yuk bagaj tashish qoidalari”ning yangi tahriri ishlab chiqilayotganini ma’lum qilgan.
Yangi tartibga ko‘ra, mahalliy yo‘nalishlarda poyezd kechiksa, yo‘lovchilarga quyidagicha kompensatsiya to‘lanadi:
• 15–30 daqiqa kechiksa – yo‘lkira qiymatining 15%;
• 31–60 daqiqa kechiksa – yo‘lkira qiymatining 25%;
• 61–120 daqiqa kechiksa – yo‘lkira qiymatining 50%;
• 121 daqiqadan ko‘p kechiksa – yo‘lkira qiymatining 100%;
Ma’lumot o‘rnida, hozirda ushbu tartib faqat “Afrosiyob” poyezdlari uchun mavjud edi, yangi qoidalar asosida esa mazkur tartibning barcha mahalliy yo‘nalishlarda qo‘llanilishi rejalashtirilmoqda.
