Rossiya harbiy samolyoti halokatga uchrashi oqibatida 29 kishi halok bo‘ldi
An-26 yengil harbiy-transport samolyoti bo‘lib, o‘rtacha masofalarga qo‘shin va texnikani tashish uchun mo‘ljallangan.
Anneksiya qilingan Qrim hududida Rossiyaning An-26 rusumli harbiy-transport samolyoti halokatga uchradi. Bu haqda Rossiya Mudofaa vazirligiga tayanib DW ma’lum qildi.
Qayd etilishicha, rejalashtirilgan parvozni amalga oshirayotgan samolyot bilan aloqa 31 mart kuni soat 18:00 atrofida uzilgan. Keyinchalik u qoyaga urilib qulagani aniqlangan.
Halokat oqibatida bortdagi 6 nafar ekipaj a’zosi va 23 nafar yo‘lovchi — jami 29 kishi halok bo‘lgan.
Vazirlikka ko‘ra, samolyotga tashqi zarba berilgani aniqlanmagan. Dastlabki taxminlarga ko‘ra, fojia texnik nosozlik sabab yuz bergan.
Ma’lumot uchun, An-26 yengil harbiy-transport samolyoti bo‘lib, o‘rta masofalarga qo‘shin va texnikani tashish uchun mo‘ljallangan. Ushbu turdagi samolyotlar bilan bog‘liq halokatlar Rossiyada avval ham kuzatilgan. Xususan, 2021 yil iyul oyida Kamchatkada sodir bo‘lgan aviahalokatda bortdagi 28 kishining barchasi halok bo‘lgan edi.
