Rossiya Ukrainaning Lugansk viloyati ustidan to‘liq nazorat o‘rnatganini ma’lum qildi
Moskva 2022-yil fevralida boshlangan urushdan buyon uchinchi bor shunday bayonot bermoqda.
Rossiya Mudofaa vazirligi chorshanba kuni mamlakat qo‘shinlari Ukrainaning sharqidagi Lugansk viloyati ustidan to‘liq nazorat o‘rnatganini ma’lum qildi. Bu haqda The Moscow Times xabar berdi.
Vazirlik bayonotida hududning egallanishi “ozod etish” sifatida ta’riflanib, G‘arbiy harbiy bo‘linmalar “Lugansk Xalq Respublikasi” deb e’lon qilingan hududning to‘liq qismini qo‘lga kiritgani bildirildi.
Qayd etilishicha, Rossiya avval ham 2022-yil va 2025-yil iyul oylarida Lugansk ustidan to‘liq nazorat o‘rnatganini da’vo qilgan.
Mustaqil tahlilchilarga ko‘ra, Rossiya kuchlari 2022-yil yozidan buyon viloyatning deyarli barcha — 26,7 ming kvadrat kilometr hududini egallashga erishmoqda.
Mazkur bayonot Rossiya qo‘shinlari yozda yangi hujum boshlashga hozirlanayotgani haqidagi xabarlar fonida yangradi. Shu bilan birga, Moskva urush yana bir necha yil davom etishi mumkinligiga tayyorgarlik ko‘rayotgani aytilmoqda.
Kreml matbuot kotibi Dmitriy Peskov Ukraina prezidenti Volodimir Zelenskiyni qo‘shinlarni qo‘shni Donetsk viloyatidan olib chiqishga chaqirdi. Peskov bu qaror ko‘plab insonlar hayotini saqlab qolishi va urushning faol bosqichini to‘xtatishi mumkinligini qayd etgan.
Zelenskiy esa AQSh vositachilari orqali Kreml tomonidan ultimatum qo‘yilganini bildirib, unda Ukraina qo‘shinlarini ikki oy ichida butun Donbas hududidan olib chiqish talab etilganini ma’lum qildi. Aks holda, Rossiya tinchlik muzokaralarida qo‘shimcha yon berishlar talab qilishi mumkinligi qayd etilgan.
