Shavkat Mirziyoyev Milliy dendrologiya bog‘ida ko‘chat ekdi

O‘zbekistonda 108 gektar maydonda tashkil etilayotgan Milliy dendrologiya bog‘i hududida ko‘chat ekish tadbiri bo‘lib o‘tdi.

 

Ma’lum qilinishicha, bog‘ hududidagi “Yashil” universitet negizida “ilm – loyiha – amaliyot” zanjiri asosida “in-vitro” laboratoriya, Dorivor o‘simliklar hamda Urug‘chilik va seleksiya markazlari barpo etilmoqda. Ushbu obyektlarni joriy yilning o‘zida ishga tushirish rejalashtirilgan.

 

“Xalqimizda “Yaxshidan bog‘ qoladi”, “Bir ko‘chat – ming baraka”, “Farzand ko‘rsang, to‘y qilsang, daraxt ek”, deb bejiz aytilmagan. Bunday hikmatli so‘zlarning ahamiyati hozir har qachongidan ham dolzarb bo‘lib borayotganini barchamiz kundalik hayotda his etib turibmiz”, — dedi Prezident. 

 

Shavkat Mirziyoyev mahalla raislari, otaxon va onaxonlarimiz, xotin-qizlar vakillari, barcha faollarga murojaat qilib, joylarda milliy urf-odatlarimiz, an’ana va qadriyatlarimizni yanada kengroq targ‘ib qilishga, mahalla aholisini hamjihatlik va ahillik ruhida mana shunday ezgu ishlarga chorlashga, klublar, jamoalar tashkil etib, har bir ko‘cha, xonadon, yo‘l bo‘ylariga nihol va gullar, qir-adirlarga daraxt va butalar ekishda yoshlarga bosh bo‘lishga chaqirdi. 

 

“Zero, yaxshi niyatda ekilgan har bir ko‘chat bu – hayot, bu – toza havo, bu – sog‘lom muhit, bu – kelajak demak!” — dedi davlat rahbari.

 

Tadbir davomida O‘zbekiston Prezidenti xorijiy mehmonlar, jumladan, BMT O‘rmonlar bo‘yicha forumi raisi Ismoil Belen, forum Kotibiyati direktori Julyet Biao hamda O‘zbekistondagi diplomatik korpus vakillariga minnatdorlik bildirdi.

 

Shundan so‘ng Prezident tadbir ishtirokchilari bilan birgalikda bog‘ning dastlabki 5 gektar hududida manzarali ko‘chatlar ekdi.

 

Shu bilan bir vaqtda, respublika bo‘ylab 21 mingga yaqin fuqaro 164 gektar maydonda 88 ming tup ko‘chat ekish ishlarida ishtirok etdi.