“Tashabbusli byudjet”da 47 ta loyiha qo‘shimcha g‘olib deb topildi
Mazkur loyihalar uchun mahalliy byudjetning qo‘shimcha mablag‘laridan jami 18,2 mlrd so‘m ajratildi.
Joriy yilgi “Tashabbusli byudjet”ning 1-mavsumi yakunlariga ko‘ra, g‘olib bo‘lmagan 47 ta loyiha qo‘shimcha mablag‘ bilan ta’minlandi. Bu haqda Iqtisodiyot va moliya vazirligi matbuot xizmati xabar berdi.
Ma’lum qilinishicha, Xalq deputatlari tuman va shahar Kengashlari tomonidan g‘olib bo‘lmagan navbatdagi loyihalarni moliyalashtirish maqsadida mahalliy byudjetning qo‘shimcha mablag‘laridan jami 18,2 mlrd so‘m ajratilib, ushbu 47 loyiha qo‘shimcha ravishda g‘olib deb e’lon qilindi.
Amaldagi tartibga muvofiq, tuman va shahar Kengashlariga mahalliy byudjet mablag‘lari hisobidan qo‘shimcha g‘olib loyihalarni e’lon qilish vakolati berilgan.
G‘olib loyihalar ro‘yxati bilan havola orqali tanishish mumkin.
O‘zbekistonda Tashabbusli byudjetning 2026-yil birinchi mavsumi doirasida o‘tkazilgan ovoz berish natijalariga ko‘ra, 1996 ta loyiha g‘olib deb topilgan. Ularni amalga oshirish uchun 3 trillion 5 milliard 827 million so‘mdan ortiq mablag‘ ajratilishi rejalashtirilgan.
