Toshkent va Sirdaryoda “Umra” ziyorati bilan bog‘liq firibgarlik holatlari fosh etildi
Mazkur holatlar yuzasidan jinoyat ishi qo‘zg‘atilgan.
Toshkent shahri va Sirdaryo viloyatida “Umra” ziyoratiga yuborish bilan bog‘liq bir nechta firibgarlik holatlari aniqlandi. Bu haqda Bosh prokuratura huzuridagi Departament xabar berdi.
Ma’lum qilinishicha, Yakkasaroy tumanida o‘tkazilgan tezkor tadbirda fuqaro R.R. boshqa bir fuqaroga tanishlari orqali viza rasmiylashtirib berish va “Umra”ga yuborishni va’da qilib, 1 650 dollar olayotgan vaqtida ashyoviy dalillar bilan ushlangan.
Shunga o‘xshash holat Uchtepa tumanida ham qayd etilib, fuqaro A.R. fuqaro M.X.ni ishontirib, viza tayyorlab berish evaziga 1 500 dollar olayotganida qo‘lga olingan.
Sergeli tumanida esa fuqaro M.M. va boshqalar fuqaroni Saudiya Arabistoniga viza tayyorlab, “Umra ziyorati”ga yuborish uchun 1 250 dollar olayotgan vaqtida ushlangan.
Sirdaryo viloyatining Guliston tumanida aniqlangan holatda esa ilgari firibgarlik uchun sudlangan fuqaro D.B. “Umra”ga yuborish va’dasi bilan 1 000 dollar talab qilib, mablag‘ning 900 dollari va 1,2 million so‘mini olayotgan vaqtida qo‘lga olingan.
Mazkur holatlar yuzasidan Jinoyat kodeksining 168-moddasi (firibgarlik) va 28, 211-moddasi (pora berish) bilan jinoyat ishlari qo‘zg‘atilib, tergov harakatlari o‘tkazilmoqda.
