Toshkentda Qurilish vazirligi bosh mutaxassisi pora bilan ushlandi
U Yunusoboddagi uylarni boshqa boshqaruv kompaniyasiga o‘tkazib berish evaziga 2200 dollar talab qilgan.
Toshkent shahrida Qurilish va uy-joy kommunal xo‘jaligi vazirligi bosh mutaxassisi pora bilan qo‘lga olindi. Bu haqda DXX xabar berdi.
Ma’lum bo‘lishicha, bosh mutaxassis Yunusobod tumanidagi 6 ta ko‘p qavatli uyga xizmat ko‘rsatishni bir MCHJdan ikkinchi MCHJga o‘tkazish bo‘yicha uy-joy mulkdorlari imzolagan dalolatnomalarni “Mening uyim” platformasida ro‘yxatdan o‘tkazib berish evaziga 2200 dollar talab qilgan. U bu ishlarni o‘zining mansabdor tanishlari orqali hal qilishni rejalashtirgan.
Tezkor tadbirda mutaxassis MCHJ rahbaridan 1500 dollar olgan paytda qo‘lga olingan. Qo‘lga olish jarayonida u qochishga uringan bo‘lsa-da, tezkor xodimlar tomonidan ushlab qolingan.
Hozirda unga nisbatan jinoyat ishi qo‘zg‘atilgan va tergov harakatlari olib borilmoqda.
