Toshkentda sud qaroridan norozi erkak daraxtga chiqib oldi
U pastga tushirilgach, Oliy sud raisi tomonidan qabul qilinib,murojaati belgilangan tartibda ko‘rib chiqish uchun rasmiylashtirilgan.
Toshkentda sud qarorlaridan norozi fuqaro Oliy sud binosi yonidagi daraxtga chiqib oldi. Holat yuzasidan Oliy sud rasmiy munosabat bildirdi.
Ma’lum qilinishicha, joriy yil 30-mart kuni 1979-yilda Toshkent viloyatida tug‘ilgan fuqaro A.Ch. Oliy sud binosi yaqinidagi daraxtga chiqib, o‘ziga nisbatan chiqarilgan sud qarorlaridan noroziligini bildirgan.
Tegishli xizmatlar tomonidan fuqaro pastga tushirilgan va uning jismoniy holati tekshirilgan. Tekshiruv natijasida unga hech qanday shikast yetmagani aniqlangan. Shundan so‘ng u Oliy sud raisi Baxtiyor Islomov tomonidan qabul qilinib, murojaati belgilangan tartibda o‘rganish uchun rasmiylashtirilgan.
Ma’lumotlarga ko‘ra, Jinoyat ishlari bo‘yicha Chilonzor tuman sudining 2020-yil 5-oktabrdagi hukmiga binoan A.Ch. Jinoyat kodeksining 184-moddasi 3-qismi bilan oqlangan. Shu bilan birga, Jinoyat kodeksining 167-moddasi 3-qismi “a” bandi bilan aybli deb topilib, 7 yil muddatga ozodlikdan mahrum qilish jazosi tayinlangan.
Birinchi instansiya sudi hukmi keyinchalik yuqori instansiya sudlari tomonidan ham ko‘rib chiqilib, o‘zgarishsiz qoldirilgan.
Shuningdek, 2025-yil 29-noyabr kuni fuqaro Oliy sud raisi qabulida bo‘lgan va unga nisbatan chiqarilgan sud qarorlarini o‘zgartirish uchun yetarli asoslar mavjud emasligi ma’lum qilingan.
Oliy sud bayonotida fuqarolarning sud himoyasidan foydalanish huquqi qonun bilan kafolatlangani, shuningdek Oliy sudga murojaat qilish uchun qonun hujjatlarida belgilangan protsessual tartiblar mavjudligi ta’kidlangan.
Sud vakillariga ko‘ra, murojaat qilish jarayonida bunday noodatiy yoki xavfli harakatlarga qo‘l urish zarur emas. Fuqarolarga o‘z huquqlarini qonuniy mexanizmlar orqali himoya qilish va belgilangan tartibda murojaat qilish tavsiya etilgan.
