Tramp NATOdan chiqish masalasini ko‘rib chiqayotganini ma’lum qildi
AQSH prezidenti NATO ittifoqchilari Eronga qarshi operatsiyada AQShni qo‘llamaganini tanqid qildi.
Donald Tramp NATO ittifoqchilari Eronga qarshi harbiy operatsiyada AQShni qo‘llab-quvvatlashdan bosh tortgani sababli AQSHning alyansdan chiqish masalasini jiddiy ko‘rib chiqayotganini ma’lum qildi. Bu haqda The Telegraph nashri xabar berdi.
Trampning ta’kidlashicha, NATO a’zolari uning qarorlariga amalda ta’sir o‘tkaza olmagan va u alyansni “qog‘oz yo‘lbars” deb baholagan.
AQSh prezidenti, shuningdek, bu holat Vladimir Putinga ham yaxshi ma’lum ekanini aytgan.
1-aprel kuni Marko Rubio Fox News telekanaliga bergan intervyusida NATO ittifoqchilari Eronga qarshi harbiy operatsiyada AQShga yordam berishdan bosh tortganiga izoh bergan. Uning fikricha, bu vaziyat Vashingtonni alyansning amaldagi rolini qayta ko‘rib chiqishga undamoqda.
Rubio AQSh o‘z manfaatlarini himoya qilish jarayonida NATOga a’zo davlatlar hududidagi harbiy bazalardan to‘liq foydalana olmayotganini ta’kidlab, alyansni “bir tomonlama harakat qiluvchi tizim” sifatida baholagan. Uning so‘zlariga ko‘ra, AQSh qo‘shinlari Yevropada qit’a xavfsizligini ta’minlash maqsadida joylashtirilgan bo‘lsa-da, Vashington yetarli darajada qo‘llab-quvvatlashni ko‘rmayapti.
Shuningdek, Tramp NATO davlatlaridan yordam kutayotganini bildirib, ayrim masalalarda ittifoqchilar avtomatik ravishda AQShni qo‘llab-quvvatlashi kerak bo‘lganini ta’kidlagan.
