Buyuk Britaniya Ho‘rmuz bo‘g‘ozini qayta ochish bo‘yicha virtual sammitga mezbonlik qiladi
Mazkur yig‘ilishda Qo‘shma Shtatlar ishtirok etmaydi.
Buyuk Britaniya payshanba kuni taxminan 30 mamlakatni Yaqin Sharqdagi muhim Ho‘rmuz bo‘g‘ozi savdo yo‘lini qayta ochish rejasini muhokama qilish uchun virtual sammitga taklif qilmoqda. Bu haqda BBC xabar berdi.
Ma’lum qilinishicha, sammitda bo‘g‘oz orqali xavfsiz harakatlanishni ta’minlash uchun diplomatik va siyosiy choralar ko‘rilishi muhokama qilinadi. Shu bilan birga, AQSh ushbu yig‘ilishga ishtirok etmaydi.
Eron AQSh va Isroilning unga qarshi olib borayotgan harbiy harakatlariga javoban bo‘g‘ozdagi bir qancha kemalarga hujum qilgan. Bu esa energetika eksportini jiddiy izdan chiqargan va yonilg‘i narxlarining keskin oshishiga olib kelgan.
AQSh Prezidenti Donald Tramp chorshanba kuni boshqa davlatlarga “kechikkan jasoratni to‘plab”, yo‘lni qayta ochishini, o‘zlari uchun o‘zlari neft “topishini” aytgandi.
Xabarga ko‘ra, Buyuk Britaniya Tashqi ishlar vaziri Yevette Kuper virtual uchrashuvning raisi bo‘ladi. Sammitda mart oyida tijorat kemalariga Eron tomonidan hujumlarni to‘xtatishni talab qilgan birgalik bayonotini imzolagan hukumatlar ishtirok etishi kutilmoqda. Ushbu bayonotni Fors ko‘rfazi mamlakatlari, shuningdek Fransiya, Germaniya, Yaponiya, Avstraliya va boshqa davlatlar qo‘llab-quvvatlagan.
Buyuk Britaniya Bosh vaziri Kir Starmer yo‘lni qayta ochish bo‘yicha “mavjud barcha diplomatik imkoniyatlarni o‘rganayotganini” aytgan. U shuningdek, Britaniya urush to‘xtagach bo‘g‘ozni ochiq va xavfsiz qilish bo‘yicha choralarni ko‘rib chiqishini bildirgan.
Dunyo bo‘yicha neft va gazning taxminan beshdan biri Ho‘rmuz bo‘g‘ozi orqali o‘tadi. So‘nggi haftalarda Brent markali neftning bir barreli 100 dollardan oshgan.
