Davlat tibbiyot muassasalari 5 kunlik ish haftasiga o‘tkazildi

O‘zbekistonda davlat tibbiyot muassasalari ish vaqti rejimi 1-apreldan 5 kunlik ish haftasiga o‘tkaziladi. Bu haqda prezidentning 2025-yil 9-noyabrdagi “Tibbiyot va farmatsevtika xodimlarini qo‘llab-quvvatlash choralari to‘g‘risida”gi qarorida belgilangan. 

 

Ma’lum qilinishicha, yangi rejimda shifoxonalar faoliyatining uzluksizligini ta’minlash maqsadida bayram va dam olish kunlari navbatchilik asosida ishlash yo‘lga qo‘yiladi.

 

Sog‘liqni saqlash vazirligining buyrug‘i bilan davlat tibbiyot muassasalarida besh kunlik ish haftasini tashkil etishning vaqtinchalik tartibi tasdiqlangan.

 

1-apreldan qo‘llaniladigan asosiy qoidalar:

 

• tibbiyot xodimlari uchun haftalik ish vaqti 36 soatdan oshmaydi;

 

• zararli va xavfli shartlarda ishlovchilar uchun qisqartirilgan ish vaqti qo‘llaniladi;

 

• yuqori ruhiy va aqliy zo‘riqishli ishlar ham 36 soatdan oshmaydi;

 

• tibbiyot xodimi bo‘lmaganlar uchun ish vaqti 40 soatni tashkil etadi.

 

Poliklinika va oilaviy shifokorlik punktlarida ish vaqti:

 

• dushanba–juma: 08:00–20:00;

 

• shanba: 08:00–14:00 (navbatchilik asosida).

 

Sog‘liqni saqlashning yangi modeli joriy etilgan hududlarda:

 

• asosiy ish vaqti: 08:00–16:00;

 

• qo‘shimcha navbatchilik: 16:00–20:00.

 

Navbatchilik Sog‘liqni saqlash vazirligining 254-son buyrug‘i asosida tashkil etiladi. Bunda ish haqi saqlanib, kamaytirilmaydi. Ichki hujjatlar va mehnat shartnomalari qayta rasmiylashtiriladi.