Endi jarima avtomobil egasiga emas, qoidabuzar haydovchiga rasmiylashtiriladi
my.gov.uz portalida jarimalarni boshqa haydovchiga rasmiylashtirish xizmati ishga tushdi.
Yagona interaktiv davlat xizmatlari portali — my.gov.uz orqali transport vositasini boshqarish huquqini boshqa shaxsga rasmiy tarzda topshirish imkoniyati yaratildi. Bu haqda portal axborot xizmati ma’lum qildi.
Yangi xizmatga ko‘ra, agar avtomobil ishonchnoma yoki yaqin qarindoshlik asosida boshqa shaxs tomonidan boshqarilayotgan bo‘lsa va u yo‘l harakati qoidalarini buzsa, jarima transport vositasi egasiga emas, balki qoidabuzarlikni sodir etgan haydovchining nomiga rasmiylashtiriladi.
Buning uchun avtomobil egasi my.gov.uz portalidagi “Sinov tartibida” bo‘limi orqali ariza yuborishi kerak. Arizada transport vositasining davlat raqami, boshqarish muddati hamda haydovchining JShShIR va pasport ma’lumotlari ko‘rsatiladi. Agar bosh ishonchnoma mavjud bo‘lsa, u ham arizaga ilova qilinadi.
Shundan so‘ng haydovchi portalidagi “Xabarnomalar” bo‘limi orqali arizani elektron raqamli imzo, Mobile-ID yoki Face-ID yordamida tasdiqlashi lozim.
Mazkur xizmat pulli bo‘lib, uning qiymati BHMning 0,9 foizini tashkil etadi. 10 foizlik chegirma hisobga olingan holda xizmat narxi 37 080 so‘m etib belgilangan. Ijtimoiy reyestrga kiritilgan shaxslar hamda I va II guruh nogironligi bo‘lgan fuqarolar uchun esa 50 foizlik chegirma amal qiladi.
Arizalar jismoniy shaxslar uchun avtomatik tarzda ko‘rib chiqiladi (bosh ishonchnoma mavjud bo‘lsa — 5 kun ichida), yuridik shaxslar uchun esa 5 ish kuni ichida ko‘rib chiqilishi belgilangan.
Shuningdek, yangi tartibga muvofiq, davlat organlari hamda yo‘lovchi tashish faoliyati bilan shug‘ullanuvchi tashkilotlar xodimlari uchun jarimani rasmiylashtirish bepul amalga oshiriladi.
