Eron AQSh va Isroil taslim bo‘lmaguncha urushni davom ettirishini ma’lum qildi

 

Eron Qurolli Kuchlari “Xatam al-Anbiya” markaziy qo‘mondonligi vakili Ibrohim Zulfag‘ariy mamlakat AQSh va Isroil taslim bo‘lishini e’lon qilmaguncha harbiy harakatlarni davom ettirishini bildirib o‘tdi. Bu haqda Mehr axborot agentligi xabar berdi.

 

Uning ta’kidlashicha, harbiy kampaniya belgilangan strategik maqsadlarga erishilgunga qadar davom etadi. Mazkur bayonot mintaqada keskinlik kuchayib borayotgan bir paytda yangradi.

 

Avvalroq AQSh prezidenti Donald Tramp Eron hududiga qarshi keng ko‘lamli harbiy operatsiya tayyorlanayotganini ma’lum qilgan edi. Uning aytishicha, operatsiya yaqin haftalarda amalga oshirilishi mumkin.

 

Ma’lumot o'rnida, harbiy harakatlar fevral oyining oxirida AQSh va Isroilning Eronga qarshi operatsiyasi bilan boshlangan. Bunga javoban Tehron Isroil hududi, AQSh harbiy inshootlari hamda Yaqin Sharqdagi energetika infratuzilmasiga raketa va dron zarbalari bergan.

 

Shuningdek, Eron global neft tashishining muhim yo‘llaridan biri hisoblangan Hormuz bo‘g‘ozini yopganini e’lon qilgan.

 

Vaziyat keskinlashib borayotgan bir paytda Rossiya rasmiylari mojaroni tezroq to‘xtatish zarurligini ta’kidlab chiqdi. Avvalroq esa Birlashgan Arab Amirliklaridagi AQSh harbiy obyektlariga ham zarbalar berilgani haqida xabarlar tarqalgan edi.