Eron mojaroni tugatish uchun vositachilar orqali shartlarini taqdim etdi
Bir qator davlatlar vositachilik qilayotgan bo‘lsa-da, hozircha muzokaralarda ijobiy natija kuzatilmagan.
Eron AQSh va Isroil bilan yuzaga kelgan mojaroni tinch yo‘l bilan hal qilish uchun o‘z shartlarini vositachilar orqali yetkazdi. Bu haqda Eronning Qohiradagi elchisi Mojtaba Ferdovsipur RIA Novosti agentligiga bergan intervyusida ma’lum qildi.
Diplomatning ta’kidlashicha, Tehron urushni tugatish uchun bir qator talablarni ilgari surgan. Unga ko‘ra, Eron kompensatsiya to‘lanishi, barcha sanksiyalarning bekor qilinishi hamda mamlakatga nisbatan tajovuz qayta takrorlanmasligi bo‘yicha aniq kafolatlar berilishini talab qilmoqda.
Shu bilan birga, elchi hozircha vositachilar tomonidan olib borilayotgan sa’y-harakatlar aniq natija bermaganini qayd etgan. Turkiya, Pokiston, Misr va Saudiya Arabistoni mintaqada tinchlik o‘rnatishga urinish qilayotgan bo‘lsa-da, tomonlar hozircha umumiy kelishuvga erisha olmagan.
Reuters agentligining o‘z manbalariga tayanib xabar berishicha, Tel-Aviv va Vashington Pokiston tomonidan ilgari surilgan vaqtinchalik sulh taklifiga ham javob bermagan.
Bundan avval Eronning Rossiyadagi elchisi Kazem Jaloliy Rossiya tashqi ishlar vaziri o‘rinbosari Georgiy Borisenko bilan uchrashuvda Moskvaning mojaroni hal etish borasidagi sa’y-harakatlari hamda Islom Respublikasiga ko‘rsatilgan gumanitar yordam uchun minnatdorchilik bildirgan.
Shu bilan birga, AQSh prezidenti Donald Tramp Vashington Eron rahbariyati bilan muzokaralar olib borayotganini ma’lum qilgan. Biroq Eron Tashqi ishlar vazirligi bunday aloqalarni rad etib, Tehronga faqat vositachilar orqali “qabul qilib bo‘lmaydigan shartlar” yetkazilayotganini bildirgan.
