Eronda AQSh va Isroil zarbalari natijasida dunyodagi eng murakkab muhandislik inshootlaridan biri vayron bo‘ldi
Ushbu inshoot mamlakatdagi yirik infratuzilma loyihalaridan biri bo‘lib, muhandislik nuqtai nazaridan murakkab konstruksiya sifatida baholangan.
AQSh va Isroil tomonidan Eron hududiga uyushtirilgan havo zarbalari oqibatida mamlakatdagi eng murakkab muhandislik inshootlaridan biri hisoblangan “B1” ko‘prigi vayron bo‘ldi. Bu haqda Alborz viloyati rasmiylariga tayanib Tasnim xabar berdi.
Ma’lumotlarga ko‘ra, zarba Karaj shahrida joylashgan ko‘prikka berilgan. Ushbu inshoot mamlakatdagi yirik infratuzilma loyihalaridan biri bo‘lib, muhandislik nuqtai nazaridan murakkab konstruksiya sifatida baholangan.
Viloyat ma’muriyati bayonotiga ko‘ra, hujum oqibatida ayrim hududlarda elektr ta’minotida uzilishlar kuzatilgan. Rasmiylar aholini voqea sodir bo‘lgan hududdan uzoqroq turishga va xavfsizlik choralariga rioya qilishga chaqirdi.
Mahalliy manbalarning bildirishicha, zarbalar ikki bosqichda amalga oshirilgan. Ikkinchi hujum qutqaruv xizmatlari birinchi zarba oqibatlarini bartaraf etish bilan band bo‘lgan paytda sodir bo‘lgan.
Avvalroq AQSh prezidenti Donald Tramp Eron hududiga nisbatan kuchli zarbalar berilishi mumkinligi haqida bayonot qilgan edi.
