Indoneziyada 7,6 magnitudali zilzila sodir bo‘ldi
Hodisa oqibatida bir kishi halok bo‘ldi, ayrim hududlarda elektr ta’minoti uzildi.
Payshanba kuni Indoneziyaning Shimoliy Maluku dengizida 7,6 magnitudali zilzila sodir bo‘ldi. Bu haqda Reuters rasmiylarga tayanib xabar bermoqda.
Ma’lum qilinishicha, hodisa oqibatida bir kishi halok bo‘ldi, binolarga zarar yetdi va sunami to‘lqinlari qayd etildi. Shu bilan birga, keyinchalik sunami bo‘yicha ogohlantiruvlar bekor qilindi.
Indoneziyaning BMKG meteorologiya agentligi beshta hududda sunami to‘lqinlari kuzatilganini bildirdi. Eng baland to‘lqin Shimoliy Sulavesidagi Minahasa hududida 0,75 metrga yetgan. Shuningdek, qariyb 50 ta aftershok qayd etilib, ulardan eng kuchlisi 5,8 magnitudada bo‘lgan.
Agentlik rahbari Teuku Fayaal Fathani dastlab 0,5 metrdan 3 metrgacha bo‘lgan to‘lqinlar yuzaga kelishi mumkinligini bildirgan, biroq keyinchalik ogohlantirish bekor qilingan. AQShning sunami kuzatuv xizmatlari ham Indoneziya, Filippin va Malayziya qirg‘oqlarida xavf ehtimoli borligini ma’lum qilgan, ammo keyinchalik bu tahdidni rad etgan.
Shimoliy Sulavesi polisiya boshlig‘i o‘rinbosari Avi Setiyononing aytishicha, Manado shahrida sport idorasiga qarashli bino qisman qulab tushishi oqibatida bir kishi halok bo‘lgan.
Indoneziya milliy tabiiy ofatlar agentligi fuqarolarni hushyorlikka chaqirdi. Bayonotda aftershoklar ehtimoli saqlanib qolayotgani sabab ehtiyot choralariga rioya qilish zarurligi ta’kidlangan.
Dastlabki ma’lumotlarga ko‘ra, bir nechta uy va cherkovlarga yengil va o‘rtacha darajada zarar yetgan.
US Geological Survey ma’lumotiga ko‘ra, zilzila epitsentri Filippin qirg‘oqlaridan taxminan 580 km, Malayziyaning Sabah shtatidan esa 1000 km uzoqlikda, 35 km chuqurlikda joylashgan. So‘nggi 50 yil ichida ushbu hudud yaqinida 7 magnitudadan yuqori yana to‘qqizta zilzila kuzatilgan, biroq ular katta talafotlarga olib kelmagan.
Mutaxassislar epitsentr aholi zich joylashgan hududlarga nisbatan yaqin bo‘lsa-da, qo‘shimcha qurbonlar ehtimoli pastligini va iqtisodiy zarar ko‘p bo‘lmasligini taxmin qilmoqda.
Agentlik vakili Abdul Muhari aholiga shikast yetgan binolardan uzoqroq turishni tavsiya qildi. Guvohlarning aytishicha, odamlar vahima ichida uylarini tark etgan, ayrim hududlarda elektr ta’minoti uzilgan.
