Neft narxlari keskin oshdi

AQSh prezidenti Donald Tramp Eron bo‘yicha harbiy hujumlar davom etishini ma’lum qilganidan so‘ng, jahonda neft narxlari keskin oshdi. Bu haqda Reuters yozmoqda.

 

Payshanba kuni savdolarda Brent markali neft fyucherslari 7,65 dollarga, ya’ni 7,6 foizga qimmatlab, bir barrel uchun 108,81 dollarga yetdi. West Texas Intermediate (WTI) nefti esa 7,06 dollarga, ya’ni 7,1 foizga oshib, 107,18 dollarni tashkil etdi.

 

Har ikki etalon ko‘rsatkich ham so‘nggi uch hafta ichidagi eng katta kunlik o‘sishni qayd etmoqda. Shunga qaramay, narxlar mojaroning avvalgi bosqichida kuzatilgan 119 dollardan yuqori darajalardan pastligicha qolmoqda.

 

Narxlarning keskin ko‘tarilishi Trampning xalqiga yo‘llagan nutqidan keyin yuz berdi. U yaqin haftalarda Eron bo‘yicha harbiy bosim kuchaytirilishini bildirib, aniq diplomatik tashabbuslar haqida ma’lumot bermadi.

 

Bozor tahlilchilari bu holatni keskinlikning davom etishi va ta’minot zanjirlarida uzilishlar ehtimoli bilan izohlamoqda. Xususan, Phillip Nova kompaniyasi tahlilchisi Priyanka Sachdeva nutqda otashkesim yoki muzokaralar bo‘yicha aniq signal bo‘lmaganini ta’kidladi.

 

Xususan, mojaro fonida dengiz transporti xavfsizligiga tahdidlar ham ortmoqda. Qatar Mudofaa vazirligi ma’lumotiga ko‘ra, QatarEnergy tomonidan ijaraga olingan neft tankeri Qatar suvlarida Eron raketasi zarbasiga uchragan.

 

Ayrim bozor ishtirokchilari Ho‘rmuz bo‘g‘ozi hududidagi portlardan foydalanish cheklangani sabab Yaqin Sharq neftiga oid ayrim savdolarni to‘xtatganini bildirgan. Mazkur yo‘lak orqali global neft ta’minotining 20 foizi o‘tadi.

 

Xalqaro energiya agentligi esa ta’minotdagi uzilishlar aprel oyidan boshlab Yevropa iqtisodiyotiga ta’sir ko‘rsatishi mumkinligidan ogohlantirdi.

 

Rystad tahlil kompaniyasiga ko‘ra, bozorlar uchun keyingi asosiy omil Eron va xalqaro hamjamiyatning javobi bo‘ladi. Hozircha Ho‘rmuz bo‘g‘ozida xavfsizlikni ta’minlash bo‘yicha aniq choralar kuzatilmayapti.