O‘zbekiston yashil Markaziy Osiyo yetakchiga aylanishi mumkin — BMTning O‘rmonlar bo‘yicha forumi raisi
Ismoil Belen O‘zbekistondagi ko‘kalamzorlashtirish tashabbusi haqida gapirdi.
BMTning O‘rmonlar bo‘yicha forumi raisi Ismoil Belen O‘zbekiston hududining hozirgi kunda qariyb 10 foizini o‘rmonlar tashkil etishini aytib, bu mamlakatni yanada ko‘kalamzorlashtirish uchun qo‘shimcha sa’y-harakatlar va investitsiyalarni talab qilishini bildirdi.
Rais Belen O‘zbekiston prezidenti Shavkat Mirziyoyev boshchiligida amalga oshirilayotgan “Yashil makon” umummilliy ko‘kalamzorlashtirish dasturini alohida ta’kidlab, tashabbus yaqin kelajakda o‘rmonlar maydonini 10 foizdan 15 foizgacha oshirishni nazarda tutishini qayd etdi.
“Men O‘zbekistonga bir necha bor kelganman, jumladan, Orol dengizining qurigan tubiga borib, u yerdagi keng ko‘lamli o‘zgarishlarga shaxsan guvoh bo‘lganman,” — dedi Belen.
U O‘zbekistonni Markaziy Osiyoda yirik tashabbus va loyihalarni amalga oshirishda yetakchi sifatida baholadi.
Belenning ta’kidlashicha, agar ushbu sa’y-harakatlar davom ettirilsa va inson hamda tabiatga yo‘naltirilgan investitsiyalar saqlab qolinsa, O‘zbekiston yashil Markaziy Osiyoning yetakchisiga aylanishi mumkin.
