O‘zbekistonda Prezident Xalq qabulxonasi tashkil etiladi
Mazkur Xalq qabulxonalarida muammolar joyida hal qilinib, murojaatlar tahlili olib boriladi.
O‘zbekiston Respublikasi Prezidenti huzurida Prezident Xalq qabulxonasi tashkil etilishi to‘g‘risida farmon imzolandi.
Farmonga ko‘ra, Qoraqalpog‘iston Respublikasi Vazirlar Kengashi Raisi hamda viloyatlar va Toshkent shahri, tuman (shahar) hokimlari tegishli Xalq qabulxonasiga jamoatchilik asosida rahbarlik qiladi. Ular muntazam ravishda fuqarolarni qabul qilib, muammolarini joyida hal qilish choralarini ko‘radi va murojaatlar tahlilini olib boradi.
Vazirlik va idoralar rahbarlari, Qoraqalpog‘iston Respublikasi Vazirlar Kengashi Raisi hamda viloyat va shahar hokimlari Prezident huzurida taqdimotlar o‘tkazib, aholi murojaatlaridagi tizimli muammolar va ularning yechimlari yuzasidan alohida hisobot beradi.
Shuningdek, O‘zbekiston Prezidenti Virtual qabulxonasi axborot tizimiga kelib tushgan murojaatlar bo‘yicha nazorat vaqti rejimi o‘rnatiladi, bunda ko‘rib chiqilishi belgilangan muddatdan o‘tgan murojaatlar ijro uchun avtomatik yuqori turuvchi davlat organiga o‘tadi.
Mazkur qabulxona axborot tizimida murojaatlarni qabul qilishda ular “shoshilinch”, “odatiy”, “maslahat talab qiluvchi” toifalariga ajratish amaliyoti yo‘lga qo‘yiladi. Nazoratga qaytarilgan murojaatlar 3 ish kuni ichida yuqori turuvchi organlar tomonidan qayta o‘rganib chiqiladi.
Aholi murojaatlari bilan ishlash bo‘yicha davlat organlari va tashkilotlari rahbarlari hisobotlarini Qonunchilik palatasi va Senatda, hokimlar hamda hududiy davlat organlari va tashkilotlari rahbarlari hisobotlarini esa tegishlicha Senatda yoki mahalliy kengashlarda har chorakda kamida 1 marta eshitib borish tartibi joriy qilinadi.
Davlat organlari va tashkilotlarining axborot xizmatlari Xalq qabulxonalari bilan hamkorlikda hududda murojaatlar bilan ishlash holatini yoritadi. Bundan tashqari ular ommaviy axborot vositalari va ijtimoiy tarmoqlardagi murojaatlarning ko‘rib chiqilishiga oid e’tirozlarni o‘rganib boradi.
Davlat organlari va tashkilotlar hamda mahalliy hokimliklar tomonidan o‘tkaziladigan shaxsiy va sayyor qabullar to‘liq raqamlashtiriladi va qabullar jarayoni ustidan nazorat o‘rnatiladi.
Jamoaviy murojaatlar aholi vakillari hamda “mahalla yettiligi” ishtirokida o‘rganilib, ularning roziligi asosida nazoratga olinadi.
