O‘zbekistonning tog‘li hududlarida qor ko‘chish xavfi e’lon qilindi
4–8-aprel kunlari yog‘ingarchilik va havo haroratining o‘zgarishi kutilmoqda.
4–8-aprel kunlari kutilayotgan yog‘ingarchilik va havo haroratining o‘zgarishi munosabati bilan respublikaning qator tog‘li hududlarida qor ko‘chish xavfi e’lon qilindi. Bu haqda “O‘zgidromet” xabar berdi.
Ma’lum qilinishicha, dengiz sathidan 2000 metrdan yuqori hududlarda qor ko‘chish xavfi saqlanib qoladi, shu jumladan:
• Qashqadaryo viloyati: Kitob, Shahrisabz tumanlarida;
• Surxondaryo viloyati: Boysun, Sariosiyo, Uzun tumanlarida;
• Samarqand viloyati: Samarqand, Urgut tumanlarida;
• Jizzax viloyati: Baxmal, Zomin tumanlarida;
• Toshkent viloyati: Bo‘stonliq, Parkent, Ohangaron tumanlari (Chotqol tizmasi tog‘lari);
• Namangan viloyati: Pop tumanida qor ko‘chish xavfi e’lon qilinadi.
Mutaxassislar tog‘li hududlarda istiqomat qiluvchi aholi, dam oluvchilar va ushbu hududlarda harakatlanuvchi haydovchilarni ehtiyotkor bo‘lishga chaqirmoqda.
