Raqobat qo‘mitasi mobil qurilmalarni IMEI ro‘yxatidan o‘tkazmasdan sotayotgan tadbirkorlarni ogohlantirdi
Fuqarolardan mobil qurilmalar IMEI kodlari tizimda ro‘yxatdan o‘tkazilmasdan sotilayotgani haqida murojaatlar kelib tushgan.
O‘zbekiston Raqobat qo‘mitasi mobil qurilmalarning IMEI kodlari ro‘yxatdan o‘tmagan holda sotilishi va xariddan so‘ng qayta ro‘yxatdan o‘tkazish zarurati tug‘ilayotgani munosabati bilan ogohlantirish berdi.
Ma’lum qilinishicha, mazkur masala bo‘yicha iste’molchilar tomonidan Raqobat qo‘mitasi va qo‘mitaning hududiy boshqarmalariga 2025-yil davomida 147 ta murojaat kelib tushgan bo‘lib, mazkur murojaatlarning 55 tasi ijobiy hal qilingan, 89 tasiga huquqiy tushuntirish berilgan. Qolgan 3 tasi tegishliligi bo‘yicha vakolatli organlarga yuborilgan.
O‘rganish natijalariga ko‘ra, O‘zbekiston Respublikasi “Iste’molchilarning huquqlarini himoya qilish to‘g‘risida”gi qonunining 6-moddasiga asosan, ishlab chiqaruvchi (ijrochi, sotuvchi) iste’molchiga o‘zi realizatsiya qilayotgan tovar (ish, xizmat)lar haqida o‘z vaqtida zarur, to‘g‘ri va tushunarli ma’lumot berishi shart.
Bundan tashqari mazkur qonuning 11-moddasida ishlab chiqaruvchi (ijrochi) kafolat muddati mobaynida tovar (xizmat)ning, shu jumladan, butlovchi buyumlarning normal ishlashini (qo‘llanilishini, ulardan foydalanilishini) ta’minlashi shartligi belgilangan.
Vazirlar Mahkamasining 778-son qarori bilan tasdiqlangan Nizomga ko‘ra, mobil qurilmalarni ro‘yxatdan o‘tkazish uchun tadbirkorlik subyektlari javobgar hisoblanadi. Barcha IMEI kodlarini ro‘yxatdan o‘tkazish majburiyati ishlab chiqaruvchi, import qiluvchi yoki sotuvchi zimmasiga yuklanadi.
Iste’molchilarning huquqlarini himoya qilish qonuniga ko‘ra, iste’molchi tovarni erkin tanlash va sifatini talab qilish huquqiga ega, sotuvchi esa qo‘shimcha xizmatlarni majburan yuklay olmaydi.
Shuningdek, chakana savdoda ro‘yxatdan o‘tkazilgan qurilmani taqdim etish mas’uliyati ham sotuvchi zimmasida bo‘ladi.
