Toshkentda avtobus piyodani urib ketdi
Holat yuzasidan rasmiy ma’lumot berildi.
Yakkasaroy tumani Shota Rustaveli ko‘chasida avtobus va piyoda ishtirokida yo‘l-transport hodisasi sodir bo‘ldi. Bu haqda “Toshshahartransxizmat” rasmiy ma’lumot berdi.
Ma’lum qilinishicha, hodisa 2-aprel kuni soat 12:41 larda Yakkasaroy tumani Sh.Rustavelli ko‘chasida yuz bergan.
"5-avtobus saroyi" filiali tasarrufida bo‘lgan, “MAN” rusumli, davlat raqami 01 /902 OJA, saroy raqami 011-bo‘lgan avtobus haydovchisi M.A avtobuslar uchun tashkil etilgan maxsus yo‘lak (BRT) bo‘ylab “Janubiy vokzal” tomondan “Bobur” ko‘chasi tomonga harakatlanib ketayotgan vaqtida, yo‘l harakati qoidalariga rioya qilmasdan yugurib yo‘lni kesib o‘tayotgan piyoda R.Zni urib yuborgan.
Haydovchi M.A yo‘lovchi R.Zga birinchi tibbiy yordam ko‘rsatib zudlik bilan tez tibbiy yordamga xabar bergan. Voqea joyiga kelgan tez tibbiy yordam brigadasi Z.Rni shifoxonaga olib borgan. Shifokorlarning birlamchi ma’lumotiga ko‘ra piyoda R.Zga bosh miyya chayqalishi tashxisi qo‘yilgan bo‘lib, hozirda piyoda shifokorlar nazoratida.
Mazkur holat yuzasidan Toshkent shahar IIBB YHXB tomonidan tergovga qadar surishtiruv ishlari olib borilmoqda.
