Farg‘onalik ota farzandiga 1 mlrddan ortiq aliment to‘ladi

Farg‘onalik fuqaro farzandi voyaga yetguniga qadar to‘lanishi lozim bo‘lgan 1 milliarddan ko‘proq aliment pul mablag‘ini birdaniga to‘lab berdi. Bu haqida MIB axborot xizmati Zamon.uz'ga maʼlum qildi.

 

Qayd etilishicha, Fuqarolik ishlari bo‘yicha sudning tegishli ijro varaqasiga asosan qarzdor M.X. dan undiruvchi K.N. foydasiga 1 nafar farzandi voyaga yetguniga qadar barcha daromadlarining 1/4 qismi miqdorida aliment undirilishi belgilangan.

 

Ushbu ijro varaqa joriy yilning 11 mart kuni Byuroning tuman bo‘lim ish yurituviga kelib tushgan hamda shu kunning o‘zida taraflarga bu haqida xabarnomalar yuborilgan.

 

Ijro harakatlari davomida ijro ishiga masʼul bo‘lgan davlat ijrochisi tomonidan taraflarga huquqiy tushuntirishlar berilgan.

 

Maʼlum bo‘lishicha, profilaktik suhbat davomida qarzdor va undiruvchi o‘zaro qonuniy nikohdan o‘tmasdan sharʼiy nikoh asosida bir muddat birga istiqomat qilishgan hamda o‘zaro kelishmovchiliklar natijasida undiruvchi aliment olish bo‘yicha qarzdorni sudga bergan.

 

Ushbu sud qaroridan qarzdorning ota-onasi xabar topishgan hamda farzandlarining huquq va majburiyatlarini to‘liq anglagan xolda voyaga yetmagan farzand o‘n sakkiz yoshga to‘lguniga qadar to‘lanishi lozim bo‘lgan 1 milliard 24 million so‘m pul mablag‘ini birdaniga to‘lash istagini bildirishgan.

 

Joriy yilning 29 mart kuni 1 milliard 24 million so‘m aliment pul mablag‘lari to‘liq undiruvchiga topshirilgan hamda ijro hujjati amalda tamomlangan.