Fors ko‘rfazidagi kemalarga hujum qilinishi oqibatida 10 nafar dengizchi halok bo‘lgan — IMO
Ho‘rmuz bog‘ozida harakat cheklangani tufayli 20 mingdan ortiq dengizchi kemalarda qolib ketgan.
Hormuz bo‘g‘ozi orqali kemalar harakatining keskin cheklanishi fonida Fors ko‘rfazida minglab dengizchilar og‘ir sharoitda qolmoqda. Bu haqda Xalqaro dengiz tashkilotiga (IMO) tayanib, BBC ma’lum qildi.
Qayd etilishicha, hozirda Eron va Ummon o‘rtasidagi tor suv yo‘lagidan o‘tishni kutayotgan qariyb 2000 ta kemada 20 mingdan ortiq dengizchi qolib ketgan. Ular Fors ko‘rfazi davlatlari yaqinidagi suvlarda langar tashlab turibdi.
Mojaro boshlanganidan buyon hududda tijorat kemalariga nisbatan 21 ta hujum qayd etilgan. IMO ma’lumotiga ko‘ra, ushbu hujumlar oqibatida 10 nafar dengizchi halok bo‘lgan, yana bir necha kishi og‘ir jarohat olgan. Tashkilot ekipajlar oziq-ovqat va zarur ta’minotlar tanqisligi, charchoq hamda kuchli ruhiy bosim bilan yuzlashayotganini bildirgan.
Xalqaro dengiz tashkiloti bosh kotibi Arsenio Dominges mavjud vaziyatga nisbatan parchalangan yondashuvlar yetarli emasligini ta’kidlab, dengizchilarni evakuatsiya qilish va zarur yordamni yetkazish uchun gumanitar yo‘laklar tashkil etish yuzasidan xalqaro hamjamiyatni diplomatik choralarni kuchaytirishga chaqirdi.
