“Issiqlik elektr stansiyalari” AJda yoshlar bilan ochiq muloqot o‘tkazildi

Bugun “Issiqlik elektr stansiyalari” AJ Boshqaruvi raisi tizimda faoliyat yuritayotgan yoshlar bilan ochiq muloqot o‘tkazdi.

 

Yangi O‘zbekistonda yoshlar siyosati davlat ahamiyatiga ega bo‘lgan eng ustuvor yo‘nalishlardan biri sifatida belgilangan. Ayni paytda yurtimiz aholisining qariyb 60 foizini, ya’ni 22 milliondan ortiq qismini yoshlar tashkil etadi.

 

                 

 

O‘zbekiston Prezidenti tashabbusi bilan 100 dan ziyod qonun va qarorlar qabul qilinib, keng ko‘lamli dasturlar amalga oshirilmoqda. Mazkur hujjatlar ta’lim sifatini oshirish, yoshlar bandligini ta’minlash, tadbirkorlikni rivojlantirish, “Yoshlar daftari” orqali ijtimoiy qo‘llab-quvvatlash, sport va sog‘lom turmush tarzini targ‘ib qilish, shuningdek, innovatsiya va axborot texnologiyalari sohalarini rivojlantirishni qamrab olgan.

 

Hozirgi kunda tizimda 10 397 nafar ishchi-xizmatchi yurtimiz aholisini uzluksiz va ishonchli elektr energiyasi bilan ta’minlash yo‘lida fidokorona mehnat qilmoqda. Ulardan 8 287 nafari erkaklar, 2 110 nafari ayollar bo‘lib, 1 527 nafarini, ya’ni 14 foizini 30 yoshgacha bo‘lgan yoshlar tashkil etadi.

 

                 

 

“Albatta, energetika sohasi mashaqqatli, biroq ayni paytda nihoyatda sharafli va mas’uliyatli sohadir. Shu bois, ushbu tarmoqda bilimli, tashabbuskor va intiluvchan yoshlarning ishtirokini yanada kengaytirishni ustuvor vazifa sifatida belgilaganmiz. Zero, barqaror ishlab chiqarish jarayoni, avvalo, yuqori malakali va o‘z kasbiga sadoqatli kadrlarga tayanadi”, – dedi Boshqaruv raisi.

 

Bugungi kunda tizimda 33 nafar yosh mutaxassis rahbar lavozimlarida faoliyat yuritmoqda.

 

Faqat o‘tgan yilning o‘zida tizim korxonalarida faoliyat yuritayotgan 3 040 nafar xodim respublikadagi turli o‘quv markazlarida malaka oshirdi. Shuningdek, 112 nafar xodim stansiyalar o‘rtasida tajriba almashish maqsadida xizmat safarlariga yuborildi.

 

Uchrashuv samimiy va konstruktiv ruhda o‘tdi. Yoshlar o‘z taklif va tashabbuslarini bevosita rahbarga bildirdilar. Ko‘tarilgan masalalar yuzasidan tegishli mas’ullarga aniq topshiriqlar berildi.

 

“Issiqlik elektr stansiyalari” AJ Matbuot xizmati