Namanganda qariyb 3 ming dona noqonuniy olib kirilgan biologik faol qo‘shimchalar fosh etildi
Hozirda holat yuzasidan jinoyat ishi qo‘zg‘atilib, tergov harakatlari olib borilmoqda.
Namangan shahrida o‘tkazilgan tezkor tadbir davomida qo‘shni davlatdan noqonuniy yo‘llar orqali olib kirilgan biologik faol qo‘shimchalar fosh etildi. Bu haqda DXX xabar berdi.
Ma’lum qilinishicha, Davlat xavfsizlik xizmati xodimlari Ichki ishlar va bojxona organlari bilan hamkorlikda o‘tkazgan tadbirda 1977-yilda tug‘ilgan mahalliy fuqaro boshqaruvidagi “Damas” rusumli avtomobil ko‘zdan kechirilgan. Tekshiruv jarayonida transport vositasi salonida xorijda ishlab chiqarilgan, biroq tegishli hujjatlarga ega bo‘lmagan 5 turdagi biologik faol qo‘shimchalar borligi aniqlangan.
Dastlabki surishtiruv davomida fuqaro va uning turmush o‘rtog‘i bergan ko‘rsatmalarga ko‘ra, ushbu mahsulotlar qo‘shni davlatdan aylanma yo‘llar orqali olib kirilgan bo‘lib, Andijon viloyati hududida ularning egasiga topshirilishi rejalashtirilgan.
Tezkor tadbirlar davom ettirilib, Andijon viloyatining Oltinko‘l tumanida mazkur mahsulotlarni qabul qilib olayotgan vaqtida ularning asl egasi — Qirg‘iziston Respublikasining Jalolobod viloyati Manas shahrida yashovchi, 1976-yilda tug‘ilgan ayol hamda u bilan birga kelgan, Qo‘rg‘ontepa tumanida istiqomat qiluvchi 1982-yilda tug‘ilgan shaxs ham qo‘lga olingan.
Aniqlanishicha, jami 2 957 dona flakondagi kapsula ko‘rinishidagi “Samyun Van”, “Cherniy tmin”, “Senna Mekkanskaya”, “Mumiye Altayskoye”, “Kist al-Xindi” nomli biologik faol qo‘shimchalarning umumiy qiymati 226 million 343 ming so‘mni tashkil etadi.
Hozirda mazkur holat yuzasidan qonunbuzarlarga nisbatan jinoyat ishi qo‘zg‘atilgan bo‘lib, tergov harakatlari olib borilmoqda.
