O‘zbekistonda dorixonalar 8,5 mlrd so‘m miqdorida asossiz daromad olgani aniqlandi
Ushbu mablag‘lar iste’molchilar foydasiga qaytarildi.
Dori vositalari narxlarini asossiz oshirish holatlarini aniqlandi. Bu haqda Raqobat qo‘mitasi xabar berdi.
Ma’lumot o‘rnida, dori vositalariga belgilangan cheklangan savdo ustamalarini oshirish holatlari bo‘yicha huquqbuzarlik Soliq organi tizimida aniqlanib, Qo‘mitaning “Fair tech” yagona axborot tizimiga xabar yuborish tizimi yo‘lga qo‘yilgan.
Qayd etilishicha, 2025-2026-yillarda Qo‘mitaning “Fair tech” yagona axborot tizimiga kelib tushgan xabarlarga ketma-ketlikda belgilangan tartibda choralar ko‘rilmoqda.
Murojaatlarni o‘rganish chog‘ida 991 ta dorixonada (152 ta ulgurji va 839 ta chakana) 414 305 ta holatda 8,5 mlrd so‘m miqdorida asossiz daromad olinganligi aniqlangan. Ushbu mablag‘lar bo‘yicha iste’molchilar foydasiga qayta hisob-kitob ishlari amalga oshirilib, ularning huquqlarini tiklash choralari ko‘rilgan.
Shuningdek, litsenziya talablarini buzish holatlari yuzasidan materiallar Farmatsevtika mahsulotlari xavfsizligi markaziga taqdim etilgan.
2025-2026-yillarda:
• "FARM EFFEKT" MCHJ;
• "PHARMA BREND" MCHJ;
• "GIPOFIZ FARM" MCHJ;
• "MAXSUDBEK BIZNES" XQ;
• "THE GREAT FARM" MCHJ;
• "MEDEX GROUP PH" MCHJlarning litsenziyalari dori vositalari narxlarini oshirilgani uchun bekor qilingan.
Qo‘mita ma’lum qilishicha, mazkur yo‘nalishdagi nazorat tadbirlari davom ettiriladi. Qonunchilik talablarini buzgan dorixonalarga nisbatan tegishli choralar ko‘rilib, ularning ro‘yxati ochiq e’lon qilib boriladi.
