O‘zbekistonda marokash chigirtkasi tarqalmoqda
Chigirtka paydo bo‘lgan hududlarda kuzatuv va nazorat kuchaytirilib, kimyoviy ishlov berish ishlari olib borilmoqda.
O‘zbekistonda zararli chigirtkalarga qarshi kurash tadbirlari boshlandi. Bu haqda O‘simliklar karantini va himoyasi agentligi ma’lum qildi.
Ma’lumotlarga ko‘ra, Qashqadaryo va Surxondaryo viloyatlarida 22-martdan, Samarqand viloyatida 24-martdan, Jizzax viloyatida esa 28-martdan zararli chigirtkalarning tuxumdan chiqqani aniqlangan. Hozirda asosan 1–2 yoshdagi marokash chigirtkasi tarqalmoqda.
Mutaxassislar tomonidan hasharotlarning aholi ekin maydonlari va tomorqalarga yetib borishini oldini olish maqsadida zarur choralar ko‘rilmoqda. Chigirtkalar aniqlangan hududlarda kimyoviy ishlov berish ishlari olib borilmoqda, kuzatuv va nazorat kuchaytirilgan.
Qayd etilishicha, an’anaviy ravishda chigirtkaga qarshi kimyoviy kurash ishlari har yili voha hududlaridan boshlanib, Qoraqalpog‘iston Respublikasi hududlarida yakunlanadi.
Ayni paytda kurash tadbirlariga 53 ta maxsus purkagichli avtomashina, 194 ta purkagichli traktor, 1000 dan ortiq motorli qo‘l purkagichlari, 25 ta suv tashuvchi transport vositasi hamda 66 ta motosikl jalb etilgan. Shuningdek, yoqilg‘i-moylash mahsulotlari va kimyoviy vositalar zaxirasi shakllantirilgan.
2026-yilda jami 651,8 ming gektar maydonda kimyoviy ishlov o‘tkazilishi rejalashtirilgan. Hozirga qadar 22 ming gektardan ortiq hududda monitoring olib borilib, 3 641 gektarda kimyoviy kurash o‘tkazilgan.
Chigirtkaga qarshi kurashni samarali tashkil etish maqsadida barcha viloyatlarda maxsus shtablar va tumanlarda tezkor otryadlar tuzilgan. Respublika bo‘yicha kuzatuv va kurash ishlariga 700 ga yaqin mutaxassis jalb etilgan.
Mutaxassislarning qayd etishicha, mamlakatda 200 ga yaqin chigirtka turi mavjud bo‘lib, har yili 6–8 turdagi zararli, to‘da hosil qiluvchi chigirtkalarga qarshi kurash olib boriladi. Mavsum davomida xizmatlar 24/7 rejimda faoliyat yuritadi.
Agentlik xabarida fuqarolardan zararli chigirtkalar tarqalgan hududlar haqida 1288 yoki 71 202 10 00 telefon raqamlari orqali xabar berish so‘ralgan.
Ta’kidlanishicha, kimyoviy ishlov berish ishlari bepul amalga oshiriladi.
