Oʻzbekistonda To‘lovga qobiliyatsizlik ishlari bo‘yicha agentlik tashkil etilishi rejalashtirilmoqda
Prezident Shavkat Mirziyoyev to‘lovga qobiliyatsizlik institutini takomillashtirish hamda moliyaviy qiyinchilikka duch kelgan tadbirkorlik subyektlarini qo‘llab-quvvatlash bo‘yicha yangi takliflar bilan tanishdi.
Shavkat Mirziyoyev to‘lovga qobiliyatsizlik institutini takomillashtirish hamda moliyaviy ahvoli og‘ir tadbirkorlik subyektlarini qo‘llab-quvvatlashga qaratilgan yangi yondashuvlar yuzasidan taqdimot bilan tanishdi.
Ta’kidlanganidek, mamlakatda xususiy biznesni rivojlantirish va tadbirkorlik faoliyatini qo‘llab-quvvatlash bo‘yicha izchil islohotlar amalga oshirilmoqda. Natijada bugungi kunda 300 mingdan ortiq yakka tartibdagi tadbirkor va 5,5 million nafardan ziyod o‘zini o‘zi band qilgan shaxs faoliyat yuritmoqda. So‘nggi besh yilda xususiy sektorning iqtisodiyotdagi ulushi 45 foizdan 58 foizga oshdi.
Taqdimotda moliyaviy qiyinchilikka duch kelgan korxonalarni erta bosqichda qo‘llab-quvvatlash, bankrotlik jarayonlarini samarali tashkil etish va biznesni saqlab qolishga qaratilgan tizimni takomillashtirish zarurligi qayd etildi.
Shu munosabat bilan Adliya vazirligi huzurida To‘lovga qobiliyatsizlik ishlari bo‘yicha agentlik tashkil etish, shuningdek sud boshqaruvchilari faoliyatini muvofiqlashtiruvchi Sud boshqaruvchilari palatasini tuzish taklif qilindi.
Bundan tashqari, moliyaviy ahvoli og‘ir tadbirkorlik subyektlarini qo‘llab-quvvatlash uchun yangi moliyaviy mexanizmlar joriy etish, kredit va soliq qarzdorliklarini restrukturizatsiya qilish, sudgacha sanatsiya choralarini kengaytirish hamda to‘lovga qobiliyatsizlik jarayonlarini raqamlashtirish bo‘yicha takliflar taqdim etildi.
Prezident ishlab turgan korxonalarni saqlab qolish, vaqtincha qiyinchilikka uchragan biznes subyektlariga o‘z vaqtida ko‘mak berish va ularni iqtisodiy faollikka qaytarish muhimligini ta’kidladi. Mutasaddilarga sohani xalqaro tajriba asosida tubdan takomillashtirish bo‘yicha aniq topshiriqlar berildi.
