PPX xodimiga qo‘l ko‘targan haydovchining IIBdagi akasi ishdan olindi
Uning voqeaga aralashishga urinishi xizmat vakolatlaridan noto‘g‘ri foydalanish ehtimoli sifatida baholandi.
Toshkent shahrining Yashnobod tumanida PPX xodimiga nisbatan sodir etilgan huquqbuzarlik bilan bog‘liq holat yuzasidan ichki ishlar organlarida xizmat intizomi masalasi muhokama qilindi.
Sirdaryo viloyati Ichki ishlar boshqarmasida o‘tkazilgan yig‘ilishda tizimdagi xizmat intizomi, profilaktika ishlari samaradorligi hamda jinoyatchilikka qarshi kurashdagi mavjud kamchiliklar tanqidiy tahlil qilindi. Yig‘ilish Diyorbek Sattarov rahbarligida o‘tkazildi.
Muhokama davomida jamoatchilik e’tiboriga tushgan hodisa — PPX xodimiga qo‘l ko‘targan haydovchining ichki ishlar tizimida ishlovchi akasi voqeaga aralashishga uringani alohida ko‘rib chiqildi. Ushbu holat xizmat vakolatlaridan noto‘g‘ri foydalanish ehtimoli sifatida baholandi.
Yig‘ilish yakunida Sirdaryo viloyati IIB rahbar xodimi, podpolkovnik Sherzod Pardayev xizmat intizomini buzganligi sababli egallab turgan lavozimidan ozod etilgani ma’lum qilindi.
Shuningdek, huquqbuzarlik sodir etgan shaxs protsessual tartibda ushlangani va unga nisbatan Jinoyat kodeksining hokimiyat vakiliga qarshilik ko‘rsatish hamda bezorilikka oid moddalariga asosan jinoyat ishi qo‘zg‘atilgani bildirildi.
Mas’ullar tomonidan ichki ishlar organlarida qonuniylik va xizmat intizomini ta’minlash ustuvor vazifa ekani, mansabidan qat’i nazar, qoidabuzarliklarga yo‘l qo‘ygan xodimlarga nisbatan qat’iy choralar ko‘rilishi ta’kidlandi.
