Qashqadaryoda bozor rahbari pora bilan ushlandi
U savdo do‘konini tadbirkorning nomiga rasmiylashtirib berish uchun pul talab qilgan.
Qashqadaryo viloyatining Dehqonobod tumanida bozor rahbari mansab vakolatini suiiste’mol qilgan holda pora talab qilgani uchun qo‘lga olindi. Bu haqda DXX xabar berdi.
Ma’lum qilinishicha, Davlat xavfsizlik xizmati hamda Iqtisodiy jinoyatlarga qarshi kurashish departamenti xodimlari tomonidan o‘tkazilgan tezkor tadbir davomida, mazkur mansabdor shaxs tadbirkorlik faoliyatini boshlamoqchi bo‘lgan fuqaroga bozor hududida joylashgan, tegishli hujjatlari rasmiylashtirilmagan savdo do‘konini sotish va keyinchalik do‘konni uning nomiga o‘tkazib berishni va’da qilgan. Evaziga u 80 million so‘m miqdorida pul talab qilgan.
Tezkor tadbir davomida esa u tadbirkordan 6600 dollar olayotgan vaqtda ashyoviy dalillar bilan ushlangan.
Hozirda mazkur holat yuzasidan jinoyat ishi qo‘zg‘atilgan bo‘lib, tergov harakatlari olib borilmoqda.
