Qibrayda kredit qarzi sabab garovdagi uy sotildi
Maʼlum bo‘lishicha, fuqaro 302 mln kredit qarzini to‘lamay kelgan.
Fuqarolik ishlari bo‘yicha Chirchiq tumanlararo sudining ijro varaqasiga asosan qarzdor S.R.dan undiruvchi “Garantbank” AJ foydasiga 302.141.200 so‘m kredit qarzdorlik undirish va undiruvni garov mulki hisoblangan A.D.ga tegishli 4 xonali uyga qaratish to‘g‘risidagi ijro hujjati Byuroning Toshkent viloyat boshqarmasi ish yurituviga kelib tushgan va ijro harakatlariga kirishilgan.
Olib borilgan ijro harakatlari davomida, qarzdor va garov mulk egasi tomonidan ijro hujjati talabi bajarilmaganligi sababli, kredit qarzdorlikni undirish maqsadida ijro varaqasida ko‘rsatilgan garov mulk egasi A.D.ga tegishli bo‘lgan garov mulki xatlanib, qarzdorlikni to‘lamagan taqdirda undiruv ushbu garov mulkiga qaratilishi to‘g‘risida ogohlantirilgan.
Shunga qaramasdan, qarzdor va garov mulk egasi tomonidan kredit qarzdorlik to‘lanmaganligi sababli, Byuroning Toshkent viloyati boshqarmasi Alohida muhim ijro ishlarini ijro etish shoʻbasi inspektorining qaroriga asosan ushbu garov mulki elektron onlayn-auksion orqali sotuvga chiqarilib, 551.250.000 so‘mga sotilgan va sotuvdan tushgan pul mablag‘i undiruvchi “Garantbank” AJ foydasiga o‘tkazilib, ijro hujjati bo‘yicha ish yurutuvi amalda tamomlangan.
