Rossiyada jazo o‘tayotgan 3 mingdan ortiq o‘zbekistonlik mahkum vatanga qaytarilishi mumkin
Buning uchun O‘zbekiston mahkumlarni o‘z fuqaroligi bo‘lgan davlatga topshirish bo'yicha xalqaro konvensiyaga qo‘shilishi lozim.
Rossiya hukumati ushbu mamlakatda jazo o‘tayotgan va jazoni O‘zbekistonda davom ettirish istagini bildirgan 3 mingdan ortiq o‘zbekistonlikni topshirishga tayyorligini bildirdi. Bu haqda Rossiya inson huquqlari bo‘yicha vakili Tatyana Moskalkova ma’lum qilgan.
Moskalkovaning so‘zlariga ko‘ra, mazkur jarayonni amalga oshirish uchun O‘zbekiston 1998 yilda qabul qilingan, mahkumlarni o‘z fuqaroligi bo‘lgan davlatga topshirish to‘g‘risidagi xalqaro konvensiyaga qo‘shilishi lozim. Toshkent ushbu hujjatni ratifikatsiya qilganidan so‘ng, Rossiya o‘zbekistonlik mahkumlarni vatanga yuborishda amaliy yordam ko‘rsatadi.
Qayd etilishicha, mazkur hujjat Belarus, Armaniston, Qozog‘iston, Qirg‘iziston va Tojikiston kabi davlatlar uchun yuridik kuchga ega. Ya’ni ushbu mamlakatlar fuqarolari istak bildirgan taqdirda Rossiya hukumati ularni o‘z yurtidagi jazoni ijro etish muassasalariga o‘tkazishi mumkin.
Shu bilan birga, OAVlarda Rossiyada jazo o‘tayotgan mahkumlar, jumladan xorijliklar ham Ukrainadagi urushga jalb qilinayotgani haqida xabarlar berilmoqda. Ayrim ma’lumotlarga ko‘ra, buning uchun mahkumlarga turli shartlar taklif etilmoqda yoki bosim o‘tkazilmoqda.
