“Samarqand 2028” sun’iy yo‘ldoshi may oyida uchiriladi
Qurilma Xitoyning StarVision kompaniyasi tomonidan ishlab chiqilgan.
Xitoyning StarVision kompaniyasi tomonidan ishlab chiqilgan “Samarqand 2028” sun’iy yo‘ldoshi joriy yilning may oyida kosmosga uchirilishi kutilmoqda. Bu haqda Oʻzbekkosmos agentligi matbuot xizmati ma’lum qildi.
Ma’lumotga ko‘ra, uchirish sanasi Toshkent shahrida o‘tkazilgan 2026-yilgi Kosmik texnologiyalar bo‘yicha xalqaro konferensiya davomida e’lon qilingan.
Agentlikning eslatishicha, o‘tgan yili tomonlar sun’iy yo‘ldosh texnologiyalarini rivojlantirish, qo‘shma loyihalarni amalga oshirish hamda ilmiy-texnik integratsiyani mustahkamlashga qaratilgan hamkorlik memorandumini imzolagan edi.
Mazkur hamkorlikning amaliy natijasi sifatida Xitoy tomonidan ishlab chiqilgan giperspektral sun’iy yo‘ldoshga “Samarqand 2028” nomi berildi. Ta’kidlanishicha, loyiha ikki tomonlama hamkorlik doirasidagi eng muhim tashabbuslardan biri hisoblanadi.
