Tramp ayrim import qilinadigan dori vositalariga 100 foizlik boj joriy qildi

AQSh prezidenti Donald Tramp ayrim import qilinadigan dori vositalariga 100 foizlik boj stavkalarini joriy etdi. Bu haqda Oq uy ma’lum qildi.

 

Qayd etilishicha, mazkur tarif AQSh bilan savdo kelishuvi tuzmagan davlatlar mahsulotlariga nisbatan qo‘llaniladi.

 

Oq uy ma’lumotiga ko‘ra, bojlar patentlangan farmatsevtika mahsulotlari va ularning tarkibiy qismlariga tatbiq etiladi. Tariflar yirik kompaniyalar uchun 120 kundan so‘ng, kichik kompaniyalar uchun esa 180 kundan keyin kuchga kiradi.

 

Yevropa Ittifoqi, Yaponiya, Koreya, Shveytsariya va Lixtenshteyndan import qilinadigan farmatsevtika mahsulotlariga 15 foizlik boj qo‘llanadi. Agar mahsulot Buyuk Britaniyada ishlab chiqarilgan bo‘lsa, tariflar pastroq bo‘ladi, chunki ushbu davlat AQSh bilan mazkur sohada hamkorlik kelishuvini imzolagan.

 

Shuningdek, AQSh Sog‘liqni saqlash vazirligi bilan “eng qulay sharoitlar rejimi doirasida narx belgilash” bo‘yicha va Savdo vazirligi bilan “ishlab chiqarishni mamlakatga qaytarish” yuzasidan kelishuv tuzgan kompaniyalar uchun boj joriy etilmaydi. Faqat Savdo vazirligi bilan kelishuvga ega kompaniyalar uchun esa 20 foizlik boj qo‘llanadi.

 

Mazkur qaror 1962 yilgi Savdoni kengaytirish to‘g‘risidagi qonunning 232-moddasi doirasida milliy xavfsizlik bo‘yicha o‘tkazilgan tekshiruvdan so‘ng qabul qilingan. Tekshiruv natijalariga ko‘ra, patentlangan dori vositalari va ularga tegishli komponentlar importi hajmi AQSh milliy xavfsizligiga tahdid solishi aniqlangan.

 

Avvalroq, o‘tgan yil kuzida ham AQSh xorijiy farmatsevtika kompaniyalari uchun, agar ular mamlakat hududida ishlab chiqarishni yo‘lga qo‘ymasa, import bojlari oshirilgan edi.

 

Dori vositalari narxini pasaytirish Donald Trampning saylovoldi dasturidagi ustuvor yo‘nalishlardan biri sifatida tilga olingan.