Afg‘onistonda minalar portlashi oqibatida bir yilda qariyb 500 nafar tinch aholi halok bo‘ldi
Qurbonlarning katta qismini bolalar tashkil etmoqda.
Afg‘onistonda o‘tgan yil davomida portlamagan o‘q-dorilar va minalar portlashi oqibatida kamida 471 nafar tinch aholi halok bo‘ldi. Bu haqda Birlashgan Millatlar Tashkilotining Inson huquqlari bo‘yicha maxsus ma’ruzachisi Richard Bennett Xalqaro minalar haqida xabardorlik kuni arafasida ma’lum qildi.
Ta’kidlanishicha, portlashlardan eng ko‘p zarar ko‘rayotgan qatlam bolalardir. Hisobotga ko‘ra, qurbonlarning qariyb 67 foizi bolalardan iborat. Ko‘plab fojialar bolalar tasodifan minalarni topib, ularni o‘yinchoq deb adashtirishi oqibatida sodir bo‘lmoqda.
Mutaxassislar qayd etishicha, bunday portlashlar o‘nlab yillar davom etgan qurolli mojarolar oqibatida hududlarda qolib ketgan portlovchi moddalar sabab yuz bermoqda. Statistik ma’lumotlarga ko‘ra, portlamagan o‘q-dorilar bilan bog‘liq hodisalar tinch aholining o‘limi bilan yakunlangan barcha holatlarning qariyb 24 foizini tashkil etadi.
Richard Bennett minalashtirilgan hududlarda sodir bo‘layotgan ommaviy o‘limlar insonning yashash huquqiga jiddiy tahdid solayotganini ta’kidladi. Uning so‘zlariga ko‘ra, 2025-yilda ayrim hududlarda keng ko‘lamli minalardan tozalash ishlari amalga oshirilgan bo‘lsa-da, muammo hanuz dolzarbligicha qolmoqda.
BMT vakili xalqaro hamjamiyatni minalardan tozalash dasturlarini moliyalashtirishni keskin oshirishga chaqirib, bu orqali tinch aholi, ayniqsa bolalar hayotini himoya qilish zarurligini ta’kidladi.
