Afg‘onistonda zilzila oqibatida 8 kishi halok bo‘ldi
Yer qimirlashi Afg‘onistonga chegaradosh mamlakatlarda ham qayd etildi.
Afg‘oniston shimoli va Pokiston g‘arbida 3-aprel kuni sodir bo‘lgan zilzila oqibatida 8 kishi halok bo‘ldi.
Ma’lum qilinishicha, juma kuni kechqurun Afg‘onistonning shimoliy qismi va Pokistonning g‘arbiy hududlarida 5,9 magnitudali zilzila yuz berdi. Rasmiylar xabariga ko‘ra, Kobul shahrida kamida sakkiz kishi halok bo‘lgan.
Zilzila epitsentri Hindukush tog‘ tizmasida, Afg‘onistonning Qunduz shahridan taxminan 150 kilometr sharqda joylashgan bo‘lib, silkinishlar butun Afg‘oniston hududida, shuningdek Pokiston va Hindiston, O‘zbekistonning ayrim qismlarida ham sezilgan.
Germaniyaning Geologiya fanlari tadqiqot markazi (GFZ) ma’lumotiga ko‘ra, zilzila 177 kilometr (110 mil) chuqurlikda sodir bo‘lgan.
Kobul viloyati hokimi matbuot kotibi Hafizulloh Basharatning aytishicha, Kobul chekkasida uy qulab tushishi oqibatida bir oilaning sakkiz nafar a’zosi halok bo‘lgan, bir bola esa jarohatlangan.
