Eron AQSHning ikkita harbiy samolyotini urib tushirdi
Mazkur hodisada ikki nafar uchuvchi qutqarilgan, bir nafar uchuvchi esa bedarak yo‘qolgan.
Eron va Fors ko‘rfazi hududida AQSHning ikkita harbiy samolyoti urib tushirildi. Bu haqda Reuters xabar berdi.
Rasmiy ma’lumotlarga ko‘ra, ikki nafar uchuvchi qutqarilgan bo‘lsa, yana bir uchuvchi bedarak yo‘qolgan va uni Eron kuchlari qidirmoqda.
AQSH rasmiylari va Eron tomonining tasdiqlashicha, birinchi samolyot — F-15E turidagi ikki o‘rindiqli qiruvchi-bombardimonchi bo‘lib, u Eron tomonidan o‘qqa tutilib urib tushirilgan. Ikkinchi samolyot — A-10 Warthog hujumchi samolyoti esa zarbadan so‘ng Kuvayt hududida qulagan, uchuvchi esa katapulta orqali qutulib qolgan.
Bedarak yo‘qolgan uchuvchini qidirish operatsiyasi davomida jalb etilgan AQSHning Black Hawk vertolyotlari ham Eron hujumi ostida qolgan, biroq ular hududni tark etishga muvaffaq bo‘lgan. Hozircha ekipaj a’zolarining jarohat darajasi va yo‘qolgan uchuvchining taqdiri noma’lumligicha qolmoqda.
Eronning Islom inqilobi qo‘riqchilari korpusi samolyot qulagan hududda qidiruv ishlarini olib borayotganini ma’lum qildi. Mahalliy rasmiylar esa “dushman kuchlari”ni qo‘lga olish yoki yo‘q qilishga muvaffaq bo‘lganlarga mukofot va’da qilgan.
Voqealar fonida AQSH prezidenti Donald Tramp Oq uyda qidiruv-qutqaruv operatsiyasi bo‘yicha hisobotlarni qabul qilmoqda. Shu bilan birga, Pentagon va AQSH Markaziy qo‘mondonligi vaziyat yuzasidan rasmiy izoh bermagan.
Mutaxassislar qayd etishicha, ushbu hodisalar AQSH va Isroil kuchlari Eron osmonida to‘liq ustunlikka ega ekani haqidagi bayonotlarni shubha ostiga qo‘ymoqda.
Avvalroq Islom inqilobi qo‘riqchilari korpusi Eron havo hududida AQSHga tegishli F-35 qiruvchi samolyoti yo‘q qilinganini ma’lum qilgandi.
