Ozarbayjon Eronga 200 tonna gumanitar yordam yubordi
Bu Yaqin Sharqdagi vaziyat keskinlashganidan buyon uchinchi yordam partiyasidir.
Ozarbayjon Eronga navbatdagi gumanitar yordam partiyasini jo‘natdi. Mamlakat ommaviy axborot vositalarining xabar berishicha, insonparvarlik yordami Islom Respublikasi aholisining mavjud ehtiyojlarini qondirish maqsadida yuborilgan.
Yordam jo‘natish to‘g‘risidagi qaror Ozarbayjon Prezidenti Ilhom Aliyev hamda Eron Prezidenti Mas’ud Pezeshkian o‘rtasida 2-aprel kuni bo‘lib o‘tgan telefon suhbatidan so‘ng qabul qilingan.
Umumiy og‘irligi 200 tonnani tashkil etgan gumanitar yuk tarkibiga 190 tonna oziq-ovqat mahsulotlari, 7 tonna dori-darmon vositalari hamda 3 tonna tibbiy buyumlar kiradi. Insonparvarlik yordami 10 ta yuk mashinasida yetkazib berildi.
Rasmiy ma’lumotlarga ko‘ra, bu Yaqin Sharqdagi vaziyat keskinlashganidan buyon Ozarbayjon tomonidan Eronga yuborilgan uchinchi gumanitar yordam partiyasidir.
Shuningdek, Eron boshqa davlatlardan ham insonparvarlik yordami olmoqda. Xususan, Eron Qizil Yarim Oy Jamiyati rahbari Pir Husayn Xolivand ma’lum qilishicha, Rossiya tomonidan 330 tonna dori-darmon va boshqa gumanitar yuk yetkazilgan.
Bundan tashqari, Eron Qozog‘iston, Xitoy hamda Iroqdan ham yordam qabul qilgan.
