O‘zbekistonda dori vositalarini ro‘yxatdan o‘tkazishda ularning xalqaro miqyosdagi samaradorligi o‘rganiladi
Dori vositalarining samaradorligi 12 ta xalqaro ilmiy manba asosida tekshiriladi.
Endilikda dori vositalarining samaradorligi xalqaro ilmiy manbalar asosida tekshiriladi. Bu haqda “Huquqiy axborot” Telegram-kanalida xabar berildi.
Ma’lum qilinishicha, adliya vazirligi dori vositalarini davlat ro‘yxatidan o‘tkazish jarayonida ularning samaradorligini aniqlash tartibini belgilovchi idoraviy hujjatni davlat ro‘yxatidan o‘tkazdi.
Yangi tartibga ko‘ra, dori vositalarining samaradorligi 12 ta xalqaro ilmiy manba asosida tekshiriladi. Ushbu jarayon mustaqil ilmiy ekspertlardan iborat komissiyalar tomonidan amalga oshiriladi.
O‘rganish natijalariga ko‘ra dori vositalari uch toifaga ajratiladi:
• samaradorligi isbotlangan dori vositalari (xalqaro ilmiy manbalarda samaradorligi tasdiqlangan bo‘lsa);
• samaradorligi isbotlanmagan dori vositalari (xalqaro manbalarga ko‘ra samaradorligi tasdiqlanmagan bo‘lsa);
• samaradorligi o‘rganilmagan dori vositalari (xalqaro ilmiy manbalarda bu borada ma’lumot mavjud bo‘lmasa);
O‘rganish natijalari Sog‘liqni saqlash vazirligi huzuridagi Farmatsevtika mahsulotlari xavfsizligi markazi davlat muassasasining rasmiy veb-saytida muntazam e’lon qilib boriladi.
