“Qamchiq” dovonida avtomobil xandaqqa tushib ketdi
Qutqaruvchilar avtomobilni xavfsiz hududga olib chiqdi.
4-aprel kuni A-373 avtomobil yo‘lining Qamchiq dovonidan o‘tgan qismida yo‘l-transport hodisasi sodir bo‘ldi. Bu haqda FVV xabar berdi.
Dastlabki ma’lumotlarga ko‘ra, “Vodiy–Toshkent” yo‘nalishida harakatlanayotgan “Cobalt” rusumli avtomobil haydovchisi boshqaruvni yo‘qotgan va transport vositasi yo‘l chetidagi xandaq (kyuvet)ga tushib ketgan.
Qayd etilishicha, holat yuzasidan O‘zbekiston Favqulodda vaziyatlar vazirligining “Qamchiq” maxsus qutqaruv boshqarmasiga xabar kelib tushgan. Voqea joyiga yetib borgan qutqaruvchilar maxsus texnikalar yordamida avtomobilni xavfsiz hududga olib chiqqan.
FVV e'lon qilgan videoda avtomobilning old qismi shikastlanganini, yon va old oynasi darz ketib, orqa oynasi singanini ko‘rish mumkin.
Hodisa oqibatida jabrlanganlar yo‘qligi ma’lum qilindi.
